Cu 96.7% voto conta, PVV ta gana eleccion di Tweede Kamer cu 37 asiento

DEN HAAG – Cu 96.7% di e votonan conta diahuebs pa 4'or di marduga segun e portal NOS.nl, Geert Wilders (PVV) tabata poni riba 2.335.858 voto, 23.4% di e voto y tabata bon pa 37 asiento, pues 4 mas cu e exitpolls a dun’e na comienso di e anochi. Cu esaki, Wilders ta gana e eleccion di Tweede Kamer, y ta haya e derecho pa forma e proximo gabinete, pa cual e mester di un mayoria di e 150 asientonan cu tin disponible. Ultimo gabinete tabatin mayoria di 2 asiento (77). Pa loke ta e otro dos partidonan, tin Groenlinks/PvdA cu 25 y VVD cu 24 cu ta 10 menos cu e situacion actual unda cu nan tin 34.

FORMACION

Mientras cu tur partido a concede e eleccion na Wilders, mayoria ta kere si cu e lo no por logra haya mayoria di asiento pa forma un gabinete. Pa forma un gobierno, e mester di por lo menos 39 asiento, y esey e tin cu bay busca entre e partidonan cu ta dispuesto pa traha cune. Algun di e partidonan cu ta dispuesto ta esun di NSC cu 20 asiento y BBB cu 7 cu no ta suficiente. Partido VVD cu 23 y Groenlinks/PvdA no kier traha cu ne, VVD sigur no kier tin Wilders como prome minister. Y varios otro manera D66 tambe a hura di no kier traha cu ne. Esey kier men cu sea e partidonan ta cambia nan tono of Wilders tin cu bay busca algun partido mas chikito, cu ta haci goberna hopi dificil y cu ta dune un gobernacion no mucho fuerte. 

ELECCION NOBO

Algun ta te hasta pone e scenario cu e formacion ta bira asina dificil, cu na final partidonan no ta sali afo y ta pone cu  mester bay eleccion atrobe. Otronan ta mustra cu pa mitar di otro aña, ta Groenlinks/PvdA cu ta e di dos partido mas grandi awor, ta haya e chens pa forma e gobernacion, y cu Frans Timmermans e ora ta bira e prome minister. Tempo lo bisa.