- Turista ta bira di 9 morto di trafico di Aruba
- Recherche noord cu detencion den caso di posesion di arma di candela
- Diasabra vuelo inaugural di Peru cu LATAM Airlines ta yega Aruba
- Embahador di Reino Hulandes na Peru impresiona cu e forsa di marca Aruba na Peru
- Minister Ursell Arends a desvela prome stacion publico pa carga auto electrico na Aruba
O.M. ta persiguiendo mas di 30 persona pa matrimonio falso
ORANJESTAD – Ministerio Publico dialuna atardi a confirma cu no menos cu 30 persona ta wordo persigui pa matrimonio falso. E caso a haya e nomber di Abielu,cu principalmente ta contra e homber O.A.T.H. kende recientemente a wordo condena pa un castigo di prison di 5 aña pa motibo cu el a traha actanan di matrimonio falso riba gran escala, a haya un rabo.
MAS HENDE DEN CORTE
Awe 20 di November 2023 un total di 17 sospechoso a presenta den Corte riba acusacion di matrimonio falso. Tur e personanan aki a acerca O.A.T.H. na algun momento den e ultimo 7 añanan, pa falsifica documentonan di matrimonio. E documentonan aki tabata wordo entrega na Censo, tin biaha hasta acompaña pa potretnan falso di matrimonio, y tabata wordo inscribi como si fuera nan tabata di berdad.
Dor di investigacion di Censo y polis, e matrimonionan falso a bin sali na cla. Riba 27 di November venidero otro 15 sospechoso lo mester presenta dilanti Corte relaciona cu e caso aki.
META DI MATRIMONIO FALSO
E meta di un matrimonio falso ta hopi cla, segun OM. Dor di un matrimonio cu un persona cu tin permiso di estadia of cu tin nacionalidad Hulandes, e pareha tambe ta haya su estadia. Envez di pidi estadia, hendenan cu no tin permiso di estadia por haya, cu un matrimonio falso, nan permiso liber (permiso di estadia pa tempo indefini) mucho mas rapido.
Censo lo scrap tur e matrimonionan falso aki. Lo keda na Dimas pa cambia of kita e estadia di e sospechosonan.
PERHUDICA SISTEMA DOOR DI ESTAFA
Dor di estafa Pais Aruba, e sospechosonan aki a perhudica e sistema di un maneho husto di stranheria.
E consecuencianan pa Pais Aruba ta grandi. Banda di e matrimonionnan falso, e actanan di nacimento y di divorcio tambe mester wordo kita, awor cu a resulta cu e informacion riba e actanan ey tambe ta falso. Tambe eroneamente a paga premienan y a duna pagonan (manera pension) na hendenan cu no tabatin derecho riba esakinan.
CASTIGO HALTO EXIGI
Pa e motibo ey fiscal di husticia a exigi castigonan di prison contra e sospechosonan. Corte a sigui Ministerio Publico pa gran parti den esaki y a duna castigonan di prison di entre 3 y 6 luna di tempo. Censo y Ministerio Publico no ta exclui cu mas matrimonio falso lo keda descubri.
Politico Otmar Oduber a entrega denuncia contra tres informante di caso Flamingo
ORANJESTAD – Conocido politico y ex minister Otmar Oduber diahuebs mainta a entrega keho contra tres informante cu lo ta instrumental den e caso penal contra e politico, esta e caso Flamingo. Diamars ultimo Hof a trata e caso unda cu Oduber a denuncia OM pasobra no kier a investiga e informantenan. Y a base di loke a desaroya diamars den e caso, Oduber a haci e denuncia. E ta splica den e relato aki, e motivacion su tras. Pa e entrevista completo mes, click AKI despues.
Relaciona cu caso Flamingo, awe Hof ta trata caso pa dicidi si ta persigui hende di KPA, LR y RST
ORANJESTAD - Awe Hof ta trata e caso unda cu ex minister Otmar Oduber ta exigi un investigacion den e caso cu 3 agente/funcionario di KPA, Landsrecherche y RST lo a actua incorecto den e caso di Oduber den caso Flamingo. Hof mester dicidi si tin suficiente pa persigui e tres personanan aki.
OM: Lo sigui bringa corupcion contra cualkier ambtenaar cu comete acto robez
ORANJESTAD - Ministerio Publico lo sigui bringa corupcion. Esaki tabata e mensahe cu OM a duna awe mainta, relaciona cu e sentencia di siman pasa unda cu un trahado di impuesto a keda sentencia pa soborno. Segun OM, e ciudadano mester por confia cu ambtenaarnan ta integro y ta trata tur hende igual. Ora un ambtenaar saca ventaha personal dor di duna cierto personanan trato preferencial, e confianza di ciudadanonan den integridad di ambtenaarnan ta wordo atacha. Juist di un ambtenaar por expect cu e ta actua na un manera integro y ta tene su mes na ley.
OM: Landsrecherche a detene ciudadado E.K. relaciona cu caso di corupcion Kwihi
ORANJESTAD – Ministerio Publico awe mainta a confirna cu awe tambe Landsrecherche a detene e ciudadano E.K. relaciona cu e caso penal Kwihi, cu ta regarda acuerdonan di servicionan (dienstverleningsovereenkomsten) den e periodo 2017-2021, cu a wordo cera dor di ex-minister Transporte, Communicacion y Sector Primario Chris Romero cu varios personanan huridico (rechtspersonen). Ministerio Publico ta sospecha cu diferente persona, entre nan E.K., a fraudulentamente ricibi placa di Pais Aruba via e construccion aki.
Corte a prohibi Embassy Suites pa traha beach dilanti e hotel
ORANJESTAD – Corte diaranson mainta via un veredicto a prohibi e hotel Embassy Suites pa traha e beach dilanti nan hotel, y mes momento ordena gobierno pa revoca e asina yama ‘aanlegvergunning’ pa e beach aki. E motibo principal ta cu e ta viola e regla di un asina yama Ruimtelijk Ontwikkelingsplan met Voorschriften esta un ROPV, unda cu segun esaki, no ta permiti un beach pa wordo crea, pasobra e ta destina pa un parke marino cu tin otro exigencia y regla. Y construccion di e beach aki, no ta cay bou di e stipulacion di e ROPV. Ademas huez ta dicta cu e minister no tabata mag di otorga e permiso di construccion di e beach y como tal a dicta cu gobierno mester revoca e permiso ey. Esaki kier men cu e fundacion Aruba Birdlife Conservation ta gana su caso unda cu huez a hustifica nan ‘obhecion’ contra dunamento di e permiso di construccion di e beach.
Huez a aproba pa scucha mas testigo den caso Flamingo, incluyendo Marisol Lopez Tromp
ORANJESTAD – Mientras cu hues diahuebs mainta a rechasa e peticion di varios abogado pa ‘wanta’ e caso Flamingo debi cu mester di mas tempo pa prepara, e la permiti si mayoria di e peticion pa scucha mas testigo den e caso. Asina mes e la bisa si cu no ta mira necesidad pa scucha ministernan actual manera Prome Minister Evelyn Wever como testigo. Uno si cu e la aproba ta actual parlamentario Marisol Lopez Tromp pa wordo scucha den caso di algun di e sospechosonan. Abogado di sospechoso Otmar Oduber tabata contento di e resultado di awe, ya cu segun e, cu e interogacion di e sospechosonan, lo trece hopi claridad den e caso di su cliente y demonstra cu su cliente no a haci nada malo.
Follow NoticiaCla
