Arends: Pa fin di otro aña edificio pa Departamento di Control di Animal mester ta cla operacional

Arends: Pa fin di otro aña edificio pa Departamento di Control di Animal mester ta cla operacional

Posted on 11/20/2023 3:50 pm AST | Updated on 11/20/2023 3:51 pm AST

ORANJESTAD – Si ta pa minister Ursell Arends, prome cu fin di 2024, e Departamento di Control di Animal lo mester ta construi y operacional na Kibaima. E minister encarga Ursell Arends a splica dialuna cu entrante diamars awor, 21 di november 2023 ta inicia e destaho publico pa ricibi diferente proposicion di companianan cu lo por asisti pa construi e Departamento en cuestion y ultimo dia ta 20 di december 2023. E centro aki, compara cu e Centro di Control di cacho cu awor por ricibi como 8 cacho so, esaki por ricibi 80 cacho y 40 pushi. Esaki lo yuda e situacion di bestia na Aruba grandemente segun e mandatario. 

LEY DI CACHO

E minister a recorda cu desde 2012, Aruba a implementa un Ley di Cacho pa enfrenta e creciente poblacion di animalnan cu ta biba riba caya. Den e prome mandato di Gabinete Wever Croes, a desaroya un plan nacional pa aborda e situacion di cachonan riba caya. Den e di dos mandato, e Ministerio di Naturalesa a asumi su responsabilidad pa e bienestar di animal y a adapta e plan na National Plan for Stray Animals (NPSA).

DEPARTAMENTO DI CONTROL DI ANIMAL

Dentro di e marco di e NPSA, ya a implementa varios pasonan di e plan, manera e creacion di un plataforma pa registracion di mascota, compilacion di material educativo pa scolnan basico, y campañanan pa stimula doñonan responsabel di mascota. Durante un conferencia di prensa dialuna 20 di november, Minister Arends a anuncia orguyosamente cu Ministerio di Naturalesa ta den e fase pre-ehecutivo pa construi e Departamento di Control di Animal. 

MANEHO EFECTIVO DI SITUACION DI CACHO Y PUSHI

Segun Minister Arends e centro aki ta clave pa maneha e situacion di cacho y pushi riba caya di un manera mas efectivo. Cachonan y pushinan cu ta wordo recogi lo haya e atencion y cuido necesario, cu e meta pa nan haya nan doño bek of pa haya un hogar nobo bou di cuido di un persona responsabel. Ademas di aloca cachonan y pushinan, e centro lo tin espacio pa otro tipo di animalnan cu ta bao di e tratado di CITES.

COLECTA DATOS

Durante e ultimo periodo, nos a colecta datos, ehecuta pasonan di e plan y evalua nan resultado. Nos comunidad ta enfrentando un reto serio debi na e cantidad di cacho cu ta circulando den nos barionan. Nos Centro di Control di Cacho ta completamente yen y e fundacionnan cu ta traha den e tereno aki a yega na nan capacidad maximo. Ta evidente cu e enfoke actual, cu ta poni enfasis ariba e control di cantidad di cacho, ta trata e simptomanan y no ta resultando manera lo mester y ta creando mas problema. Aunke e plan a ser diseña pa atende cu un problematica serio, ta keda claro cu no ta suficiente pa trata e problema na su origen. Pa e motibo aki, ta necesario introduci un maneho diferente cu un enfoke preventivo y holistico pa garantisa e bienestar general di animal door di mehora e relacion entre e hende y animal. 

 

Minister Arends ta menciona cu e ta desea di wak un Aruba cu ta ser conoci como un pais respetuoso y protector di tur ser bibo incluyendo e animal. E ministro ta continua ta bisa cu ta vital pa ciudadanonan tur comprende cu e problematica di cacho y pushi riba caya no ta un problema di e animalnan mes, sino di nos hendenan. E falta di amor, empatia, respet y sentido di responsabilidad pa nos animalnan ta resultado di abuso, crueldad y e cantidad alarmante di cacho y pushi cu ta ser bandona door di nan mesun doñonan. Den un sociedad unda nos ta conoci pa nos hospitalidad, creatividad, y dinamismo, ta lamentabel cu nos no ta refleha e mesun respet y amabilidad na nos bestianan domestico. Minister Arends ta menciona cu e maneho nobo lo ser trata na inicio di e aña nobo cu e colaboracion di stakeholder pa nan participacion, prome cu e wordo publica.

 

 

 

  • Varadero
  • Powered by SETAR