- Recherche noord cu detencion den caso di posesion di arma di candela
- Diasabra vuelo inaugural di Peru cu LATAM Airlines ta yega Aruba
- Embahador di Reino Hulandes na Peru impresiona cu e forsa di marca Aruba na Peru
- Minister Ursell Arends a desvela prome stacion publico pa carga auto electrico na Aruba
- VIDEO: Minister Wever: Unico cos cu kizas por haci, ta na e suma cu DUCAPRO kier cobra pa toca musica
Arends: Pa fin di otro aña edificio pa Departamento di Control di Animal mester ta cla operacional
ORANJESTAD – Si ta pa minister Ursell Arends, prome cu fin di 2024, e Departamento di Control di Animal lo mester ta construi y operacional na Kibaima. E minister encarga Ursell Arends a splica dialuna cu entrante diamars awor, 21 di november 2023 ta inicia e destaho publico pa ricibi diferente proposicion di companianan cu lo por asisti pa construi e Departamento en cuestion y ultimo dia ta 20 di december 2023. E centro aki, compara cu e Centro di Control di cacho cu awor por ricibi como 8 cacho so, esaki por ricibi 80 cacho y 40 pushi. Esaki lo yuda e situacion di bestia na Aruba grandemente segun e mandatario.
LEY DI CACHO
E minister a recorda cu desde 2012, Aruba a implementa un Ley di Cacho pa enfrenta e creciente poblacion di animalnan cu ta biba riba caya. Den e prome mandato di Gabinete Wever Croes, a desaroya un plan nacional pa aborda e situacion di cachonan riba caya. Den e di dos mandato, e Ministerio di Naturalesa a asumi su responsabilidad pa e bienestar di animal y a adapta e plan na National Plan for Stray Animals (NPSA).
DEPARTAMENTO DI CONTROL DI ANIMAL
Dentro di e marco di e NPSA, ya a implementa varios pasonan di e plan, manera e creacion di un plataforma pa registracion di mascota, compilacion di material educativo pa scolnan basico, y campañanan pa stimula doñonan responsabel di mascota. Durante un conferencia di prensa dialuna 20 di november, Minister Arends a anuncia orguyosamente cu Ministerio di Naturalesa ta den e fase pre-ehecutivo pa construi e Departamento di Control di Animal.
MANEHO EFECTIVO DI SITUACION DI CACHO Y PUSHI
Segun Minister Arends e centro aki ta clave pa maneha e situacion di cacho y pushi riba caya di un manera mas efectivo. Cachonan y pushinan cu ta wordo recogi lo haya e atencion y cuido necesario, cu e meta pa nan haya nan doño bek of pa haya un hogar nobo bou di cuido di un persona responsabel. Ademas di aloca cachonan y pushinan, e centro lo tin espacio pa otro tipo di animalnan cu ta bao di e tratado di CITES.
COLECTA DATOS
Durante e ultimo periodo, nos a colecta datos, ehecuta pasonan di e plan y evalua nan resultado. Nos comunidad ta enfrentando un reto serio debi na e cantidad di cacho cu ta circulando den nos barionan. Nos Centro di Control di Cacho ta completamente yen y e fundacionnan cu ta traha den e tereno aki a yega na nan capacidad maximo. Ta evidente cu e enfoke actual, cu ta poni enfasis ariba e control di cantidad di cacho, ta trata e simptomanan y no ta resultando manera lo mester y ta creando mas problema. Aunke e plan a ser diseña pa atende cu un problematica serio, ta keda claro cu no ta suficiente pa trata e problema na su origen. Pa e motibo aki, ta necesario introduci un maneho diferente cu un enfoke preventivo y holistico pa garantisa e bienestar general di animal door di mehora e relacion entre e hende y animal.
Minister Arends ta menciona cu e ta desea di wak un Aruba cu ta ser conoci como un pais respetuoso y protector di tur ser bibo incluyendo e animal. E ministro ta continua ta bisa cu ta vital pa ciudadanonan tur comprende cu e problematica di cacho y pushi riba caya no ta un problema di e animalnan mes, sino di nos hendenan. E falta di amor, empatia, respet y sentido di responsabilidad pa nos animalnan ta resultado di abuso, crueldad y e cantidad alarmante di cacho y pushi cu ta ser bandona door di nan mesun doñonan. Den un sociedad unda nos ta conoci pa nos hospitalidad, creatividad, y dinamismo, ta lamentabel cu nos no ta refleha e mesun respet y amabilidad na nos bestianan domestico. Minister Arends ta menciona cu e maneho nobo lo ser trata na inicio di e aña nobo cu e colaboracion di stakeholder pa nan participacion, prome cu e wordo publica.
VIDEO: Minister Wever: Unico cos cu kizas por haci, ta na e suma cu DUCAPRO kier cobra pa toca musica
ORANJESTAD – E unico posibilidad pa haci algo pa radio emisoranan, kizas ta e suma cu nan tin cu paga e fundacion DUCAPRO otro aña pa toca musica publicamente. Asina minister di Telecomunicacion Geoffrey Wever a bisa Tito Laclé diahuebs anochi den e programa Noticiacla LIVE. E mandatario a confirma cu e radio emisoranan tin problema cu e hecho di cobransa, cuanto cu sea. E mandatario a reuni cu nan y a bisa nan cu e no por haci mucho, pero posiblemente por haci algo cu e suma. E la keda di reuni bek cu nan otro siman despues cu awe e haya un conseho final di kico e como minister por haci. Por wak e segmento ey di e programa AKI tambe.
Construccion di centro nobo di polis na Cumana ta inicia di dos cuartal di 2024
ORANJESTAD – Construccion di e warda di polis nobo na Cumana ta inicia na Maart di 2024. Asina minister di husticia Rocco Tjon a confirma diahuebs, despues di a reuni cu esnan cu ta financia e proyecto aki, esta APFa. A reuni cu e architecto di e proyecto y representante di APFA pa e proyecto. E intencion ta pa converti e edificio di ex Codemsa den un centro moderno pa polis. Varios departamento lo resorta bou di un dak asina y keda central. E intencion ta pa Februari 2024 conoce ken ta bay ta encarga cu e construccion y pa un luna despues cuminsa cu e construccion.
Vrolijk: Ta den man di gobierno mes, si e LAFt ‘nobo’ ta keda aproba na tempo
ORANJESTAD – Tur cos ta den man di gobierno di Aruba si ta keda cla cu e ley di LAFt, prome cu fin di aña, cumpliendo asina cu exigencia di gobierno Hulandes. Asina presidente di Parlamento Edgard Vrolijk a bisa noticiacla.com diahuebs mainta. E presidente a confirma cu awe a fiha fecha pa parlamentarionan hasi pregunta riba presupuesto supletorio y e cambio di LAFt. “ Despues di e fase ey e ta den man di gobierno” Vrolijk a bisa. Cu esey e kier men cu ta keda na gobierno pa entrega nan NAV, cu ta e contestacion di e preguntanan di e parlamentarionan. Den terminologia politico esaki ta e NAV, e ‘Nota naar Aanleiding van het Verslag.
Arends: Awor por re-aplica digitalmente pa permiso di taxi
ORANJESTAD - Minister encarga cu transporte publico Ursell Arends diaranson mainta anuncia e siguiente paso den e proceso di digitalisa e aplicacion pa permiso.
Gobierno di Aruba a manda e ley di LAFt pa Parlamento
ORANJESTAD – A dura un poco, pero finalmente gobierno di Aruba a confirma diaranson cu nan a keda cla cu e concepto di ley di LAFt, despues cu Hulanda a informa di esaki for di diabierna siman pasa. Segun un comunicado di gobierno nan ta bisa cu despues di e deliberacionnan cu Hulanda durante e ultimo simannan, manera a keda aproba den Conseho di Minister di Reino di dia 27 di October ultimo, Aruba y Hulanda a yega na acuerdo riba e cambionan di LAft. LAft ta e Ley di Supervision Financiero cu ta duna e cuadro legal na e CAft pa haci trabou di supervision finaciero na Aruba. E ley di LAft aki tawata anticua y no tawata contene e normanan recien. Cu e cambionan cu a wordo presenta awe na Parlamento, e normanan ta actualisa.
Gobierno ta aporta pa concientisacion y prevencion contra cancer di prostaat
ORANJESTAD – Minister di Turismo y Salud Publico sr. Dangui Oduber a atende e lansamento di e videonan pa prevencion y concientisacion contra Cancer di Prostaat. Den clausura di luna di November ta dedica na e ser masculino y na e Fundacion Contra di Prostaat (FCCP) na Aruba.
Follow NoticiaCla
