Cillie: Pakico parto no a tuma lugar na hospital sino na AZV

ORANJESTAD – E hecho cu e dama ,- cu recientemente a duna luz na AZV-, tabata ‘dehado’, e no por a duna luz na hospital. Esaki a keda confirma pa director interino di hospital Ezzard Cillie na NoticiaCla.com. E informacion cu e dama a wordo nenga entrada na hospital y pesey no por a duna lus eynan, no ta completamente corecto. Su carchi di AZV no tabata actualisa y como tal, hospital a avise delanta pa drecha su situacion cu AZV prome cu e bin hospital. “Lamentablemente e pareha a skohe diferente cu e consecuencia ya conoci” Cillie a sigui bisa.

PARTO NA AZV

Tabata NoticiaCla.com cu a trece e noticia den forma di primicia y exclusivo, cu un dama cu a bay ‘regla su asuntonan na AZV’, a haye ta duna luz eynan mes. E parto a bay hopi bon y e pareha venezolano a keda bendiciona cu un baby girl. Pero despues e informacionnan a cuminsa drenta riba e motibo real pakico e dama a ‘resulta na AZV’ enbes di hospital, pa a duna luz: su carchi no tabata valido. E noticia a core mesora cu ta hospital a nenga e pareha entrada na hospital, ora cu ya caba e dama a cuminsa haya e dolornan necesario di un parto. Y ora cu e lo a wordo rechasa na hospital, e la dicidi di bay AZV pa ainda ‘regla su carchi’ na tempo. Esey sinembargo a sosode cu e resultado conoci.

CONTRACTO

Segun Cillie a splica, cos no a bay exactamente asina. “E contrato entre hospital cu AZV ta, cu cada persona/asegurado mester demostra cu e ta registra y cu un carnet valido di AZV” Cillie a cuminsa na bisa. “ Si nos juda e persona aki sin un carnet valido nos ta core e riesgo cu AZV no ta cubri e gastonan. Esaki no ta nos regla, sino segun e contrato cu nos tin cu AZV”. Segun Cillie, esaki ta conta pa tur dunador di cuido. “Esaki lo tabata diferente si tabata un caso di emergencia, di cual un embarazo no ta e caso” Cillie a sigui bisa.

DEHADO

Ademas, Cillie ta bisa cu e asegurado en cuestion tabata na altura cu su carnet tabata caduca for di mas cu un luna pasa: ”Es mas, e mesun mainta tempran e asegurado a worde notifica pa e pasa AZV prome cu e bai hospital!. Lamentablemente e pareha a scohe diferente cu e consecuencia ya conoci.”. E director interino a sigui bisa cu no ta pornada cu AZV y Hospital ta keda enfoca pa bo carnet semper ta na orde, por si acaso bo haña bo cu urgencia. “Den e caso aki e señora tabatin suficiente espacio pa evita e incidente aki cu eventualmente a resulta sin complicacion” e director a bisa finalmente.