Persona cu a causa 'bululu' riba bus di Arubus, prohibi pa tempo indefini di subi bus

ORANJESTAD – E compania nacional di transporte Arubus NV a ‘ban’ of prohibi e persona ,-cu diaranson ultimo a causa un escena den un di e busnan faltando respet den un di e busnan -, pa tempo indefini. Asina e compania a bisa diabierna riba nan pagina di Facebook. Por corda con recientemente un video a cuminsa circula di un caso unda cu un pasahero a cuminsa agredi e chauffeur di e bus verbalmente y fisicamente (di loke por a nota di e video) y cual video a bay viral. Arubus awe a reacciona y bisa cu e no ta tolera ningún falta di respet, tampoco ningun tipo di mal comportacion contra cualkier empleado di nos compania y tampoco contra ningún di nos pasaheronan.

ANALISA E SUCESO 

Segun e compania siguiendo nan procedura acostumbra, a analisa tur prueba cu por a haya, interno y externo. “Tambe nos a scucha e chauffeur en cuestión su experiencia cu e caso y muy principalmente pa su situación emotional den e caso aki”. Na momento cu pruebanan a wordo analisa y documenta, Gerencia a bai over na tuma un decisión riba e a caso aki.

PROHIBI ACESO NA E BUS

Mesora gerencia di Arubus a informa e persona en cuestión pa medio di un carta, cu su persona ta prohibi di subi cualkier propiedad di Arubus, incluyendo nos busnan pa  un tempo indefini.

Alavez Arubus kier a elogia e chauffeur en particular cu a hanja su mes den e incidente aki, caminda e la demostra un actitud hopi trankilo y profesional y a sa di domina su mes na e miho manera cu Arubus por a spera di su persona.

ZERO TOLERANCIA 

Pa medio di esaki Arubus NV a enfatisa, cu lo no tolera ningún tipo di agresión, falta di respet, intimidación y muhcu menos unsultonan den dirección di nos empleadonan ni tampoco nos pasaheronan riba cualkier propiedad di Arubus, incluyendo busnan riba caminda transportando publico. “Arubus NV ta spera cu e tipo di incidentenan, manera esun di Diaranson ultimo no tuma lugar” e compania a finalisa bisando.