Sevinger: Aruba no ta prepara pa un influx for di Venezuela

ORANJESTAD – No tin ningun menasa pa un influx di venezolano pa Aruba. “Nos no tin ningun indicacion cu esaki ta e caso, por lo menos pa awor” minister encarga cu integracion (permiso), Benny Sevinger a confirma na NoticiaCla.com. Ademas, e ta mustra cu nos no ta cla pa un tipo di accion asina tampoco. E la confirma e noticia di NoticiaCla.com tambe cu Aruba lo forma parti di un plataforma riba e tema di asistencia y problema di imigracion den e region.

NACIONAN UNI

Segun Sevinger, enberdad Nacionnan Uni a invita Aruba ta pa un di e 8 paisnan cu ta bay lanta e plataforma aki. E plataforma aki lo duna recomendacion den e region di Caribe. Sevinger a concedi cu Aruba lo duna cooperacion unda cu por y cu ta importante berdad pa tin cifranan real di pakico hende ta imigra den region di Caribe. Esaki no kier men sinembargo cu Aruba ta bira e centro di henter e operacion aki. “Mester wordo dicidi unda e reunionnan ta tuma lugar. No ta un area specifico tin. Ta na Washington e centro ta cu ta dicidi tur esey. E prome aña e reunion por ta na Aruba y despues ta bay otro caminda”.

VENEZUELA

Un rato a toca e tema di Venezuela, cu mundo ta vigilando di cerca. “Nos cu ta cerca di Venezuela no ta keda for di e asunto aki, si un hende ta busca un miho porvenir, cu den e caso aki por ta Aruba”. Segun e mandatario, nos tin cu mira e situacion ey. Si mira e situacion ora cu hendenan den caso di guera ta migra bay liher, e ora e plataforma ta bin hunto, incluyendo Nacionan Uni, pa yuda e paisnan cu asistencia. “Con bo ta handle un fluho di hende asina ey” Sevinger a bisa. E ta referi na un posibel influx di hende diripiente for di Venezuela pa Aruba.

INFLUX

Aruba no ta prepara pa un influx di venezolano. “Nos no tin esey ariba nos netvlies. Nos simplemente ta monitoria tur pais rond di nos, y Venezuela. Pero nos no ta riba ningun tipo di alerta pa ningun clase di peliger pa cu esaki” Sevinger a bisa.