Arends: Auto cu stuurwiel rechts no ta peligroso riba caminda

ORANJESTAD – Pa un grupo di entre 750 pa 800 doño di auto (of mas) cu stuurwiel na man drechi, holoshi a cuminsa core, prome cu nan haya e prohibicion di core cu e autonan na Aruba. E decision di minister Arthur Dowers di husticia pa pone un paro na e autonan aki, no ta un sorpresa segun ciudadano Eddie Arends, cu ta un di e personanan mas conoci na Aruba cu tin e tipo di auto aki. Segun Arends, te awe, e no a haya un motivo ‘valido’ pa stop e autonan aki. E argumentonan conoci (peligroso, no por pasa den drive thru etc) no ta valido pa Arends.

BENEFICIO

Arends mes ta core e autonan aki for di 2003, y no ta mira motibo pa cambia esaki. E ta bisa mes momento cu contrario na pensamento di e minister, no ta existi auto peligroso. “Chauffeur peligroso ta existi” Arends ta bisa. E motibo pa cual e autonan aki ta wordo importa na Aruba y ta popular, ta pasobra nan ta bin na un prijs hopi mas abou, pero cu un calidad hopi mas halto. Cu esey, Arends kier men cu pa e prijs cu bo ta paga, bo ta haya mucho mas cos cu e auto. Entre nan, p.e. 8 airbag contra 2, pa un auto ‘normal’. Tur e ‘add ons’ riba e auto, bo no ta haye riba un auto ‘regular’. E prijs tambe pa un auto asina (auto Hapones), ta mucho mas barata cu un auto regular. Como ehempel, un auto nissan skyline GT 350, cu na hapon ta 2.800 dollar. Normalmente un auto asina ta costa 120 mil florin. Un auto manera cu Arends ta paga pa un auto asina, 15 pa 20 mil florin te na Aruba, enbes di 100 mil florin.

DESVENTAHA

E unico ‘desventaha’ ta cu e stuur ta na banda drechi. Asina mes, Arends ta mustra cu e tin 12 aña ta core e autonan aki y nunca e no a wak un peliger y nunca e la haya su mes den un accidente. “Y si tin accidente mes, bo tin cu wak cuanto biaha e ta culpa di un tegenpartij”, Arends ta sigui bisa.

BALANSA

Segun Arends, tin cu bay tuma e asunto aki den un balansa. Por para e autonan di core, pero mester wak e beneficio tambe cu e autonan aki ta trece pa Aruba. “E autonan aki ta paga impuesto maenra tur auto. Nan ta paga invoerrechten, number di auto etc.” E motibonan duna pa para e autonan aki, pa Arends no ta valido. E kier pa mustra dicon e autonan ta peligroso.

SINTA NA MESA

Den e caso aki, si prohibi e autonan a ki di core, nan ta haya nan mes pega. Como tal nan kier sinta cu e minister na mesa, pa e por haya nan punto di bista riba e tema aki. Si cunsumi, y rabia, no ta yega ningun caminda. Como tal nan ta bay purba sinta cu e minister pa rasona cune riba e tema. No tin un asosacion aworaki, pero si a lanta un grupo riba Facebook, y ta sperando cu via e pagina aki, por haya un tipo di union y ayudo.

NO TA SORPENDI

Arends no ta sorprendi cu e accion aki lo bin. “Mi tabata sa cu algo asina lo a bin ‘atrobe’ pasobra e tabata un tema basta tempo pasa. Pero segun Arends, ora cu un volcan ta keto, bo mester tin miedo pasobra e por rementa atrobe. Te awe, e minister no a aserca e grupo di doño di auto cu stuurwiel na banda rechts. E mester tin ehempel valido pa por tin efecto, segun Arends.