Mc William (MAN) convensí cu Corsou lo beneficia di union entre MAN y PIN

WILLEMSTAD - “Kòrsou lo sali benefisiá for di e union entre partidonan MAN i PIN. Mi ta konvensí di esaki.” Asina lider polítiko di partido MAN, Giselle Mc William a sigurá durante un konferensia di prensa ayera na sede di partido MAN pa anunsiá ofisialmente e koperashon entre partidonan MAN i PIN pa próksimo elekshon.

Mc William a sali splika ku tin hopi fragmentashon i divishon den polítika i bou di poblashon. Den e kuadro aki e ta haña ku polítikonan tin e deber di duna e bon ehèmpel, krea speransa i mustra ku union ta posibel den arena polítiko. “E manera kon PIN i MAN a bin ta hasi esaki den forma harmonioso i demostrando rèspèt pa otro ta algu ku nos ke reflehá bèk den futuro na pueblo di Kòrsou”, Mc William ta bisa.

“Último elekshon tabatin 23 partido ku ke a partisipá na elekshon. Di e 23 partidonan aki 16 mester a partisipá na pre elekshon i 8 di e partidonan aki a haña sufisiente sosten pa bai elekshon. Al final 15 partido a partisipá na elekshon, pero 6 partido so a logra 1 asiento òf mas.”

Segun Mc William esaki ta nifiká ku mas ku 25 porshento di persona ku a sali nan kas i a bai vota no ta representá den parlamento. “Esaki ta 25 mil persona mas òf ménos ku debí na e fragmentashon den polítika no ta representá den parlamento”

Esaki segun Mc William ta un di e motibunan prinsipal ku partidonan MAN i PIN a logra haña otro lihé mirando e fragmentashon i divishon aki. “MAN i PIN su balornan riba e punto aki ta mesun kos, i nos ke aportá na un manera harmonioso i respetuoso na pais.”

E idea pa e dos partidonan aki aserká otro no a kai for di shelu. Mc William a bisa ku for di momento ku el a bira lider polítiko di MAN el a papia di aliansa i e aliansa entre partidonan MAN i PIN ta un ehèmpel di loke e tabata papia di dje.

Durante bishitanan di trabou na Hulanda el a hiba kombersashon entre otro ku lider polítiko di partido GroenLinks, Jesse Klaver i di parlamentario pa PvdA, Attje Kuiken ku a traha riba un kolaborashon entre e dos partidonan. Di e kontaktonan aki Mc William ta bisa ku el a siña kon ta e mihó manera pa kana un proseso similar na Kòrsou.

Unabes na Kòrsou Mc William a kana e proseso den MAN pa aserká partido PIN ku e resultado ku ayera a firma e akuerdo di koperashon. E lider di MAN ta bisa ku no ta ekskluí e posibilidat ku promé ku elekshon yega ku ta sera mas aliansa ku grupo òf individuonan pa sigui fortifiká e union.

Finalmente Mc William ta bisa ku e proseso pa a logra yega na otro tabata profundo. “Partidonan tabatin kontakto kontinuo ku nan órganonan di konseho i debí na e esaki no tabatin opstákulonan grandi ku a stroba e proseso pa a yega na un union entre e partidonan.”NOTA: E texto ta scirbi den Papiamento fonetico di Corsou.