- Turista ta bira di 9 morto di trafico di Aruba
- Recherche noord cu detencion den caso di posesion di arma di candela
- Diasabra vuelo inaugural di Peru cu LATAM Airlines ta yega Aruba
- Embahador di Reino Hulandes na Peru impresiona cu e forsa di marca Aruba na Peru
- Minister Ursell Arends a desvela prome stacion publico pa carga auto electrico na Aruba
Van Huffelen a ripiti su desapunto riba tema di matrimonio mesun sexo na politico local
DEN HAAG – Via un carta manda pa un parlamentario local, cu e la comparti tambe cu Tweede Kamer, a bira conoci cu secretario di estado Hulandes Alexandra van Huffelen a sigui e caso di Cassacion recien riba matrimonio di mesun sexo. Mas investigacion a revela cu tabata un carta dirigi na parlamentario Miguel Mansur. E mes a confirma diahuebs cu e carta aki tabata dirigi na su persona. Bek pa e carta, van Huffelen ta reitera tambe su desapunto grandi na e politico local Mansur, cu ainda na Aruba y Corsou personanan di mesun sexo no por casa cu otro. E occasion awor riba e tema tabata un contesta di e mandatario na un ciudadano di Aruba cu a haci un serie di pregunta riba e tema.
HULANDA NO POR METE
E mandatario a bolbe bisa cu den e caso aki, Hulanda no por cay aden (ainda) y ordena e dos paisnan pa nan cambia e ley, pasobra ta trata di paisnan autonomo, conforme articulo 43 di statuut. Ademas, e asunto ta den tratamento ainda den corte pues e ultimo palabra no a wordo bisa ainda. E ta sigura cu tin momento pa Hulanda interveni, pero esaki no ta un di nan (ainda). Den e caso aki awor manera e situacion ta, e ta algo cu Aruba y Corsou mes mester y dicidi y tin cu trata.
LOKE SI POR METE
Segun e mandatario e la recorda cu tin momentonan si cu Hulanda por tene e islanan en cuestion responsabel y atene nan na cierto tratadonan. E ta haci mencion aki specificamente di e hurisprudencia di Hof Europeo riba derecho di hende, unda cu ta bisa cu si e pais no habri e posibilidad pa matrimonio di mesun sexo, e mester ofrece un alternativa. Algo cu segun van Huffelen a confirma cu Aruba a haci, refiriendo na union civil. Por lesa e version di e carta cu ta tapa e nomber pa privacidad AKI.
Secretario di estado Uslu ta retira pa bolbe Corendon como su CEO
DEN HAAG – Secretario di estado demisionario Hulandes pa Enseñansa, Cultura y Ciencia, G. Uslu a haya su retiro entrante awe 1 di December di Rey Willem-Alexander. Esaki pasobra Uslu ta bay asumi un funcion den sector priva, bolbiendo e compania cu e y su ruman a lanta, Corendon, y lo asumi e posicion di CEO. Mientras cu no nombra un secretario di estado nobo, minister cu e mesun cartera, Dijkgraaf ta tuma e tarea temporalmente
Resultado oficial di eleccion Tweede Kamer ta confirma PVV e partido mas grandi di Hulanda
DEN HAAG – E resultado oficial di eleccion pa Tweede Kamer ta confirma cu partido PVV ta e partido di mas grandi di Hulanda. Oficialmente PVV ta logra 37 asiento, 20 mas cu den 2021. Groenlinks/PvdA ta bira e di dos partido mas grandi (25 cu 8 mas, pero corda cu e ultimo eleccion e partidonan a participa independientemente. VVD ta perde 10 asiento y ta bin na 24 asientio y e partido nobo NSC di Pieter Omtzigt ta logra 20 asiento. Un total di 38 candidato a haya suficiente voto preferencial pa por saca nan mes. Pero mayoria di nan lo a drenta Tweede Kamer toch, sin e votonan ey. Di e 13.5 miyon votadornan, 10.4 a vota cu ta haci e porcentahe 77.7 mas abou cu 2021.
Plasterk a sigui cu reunionan cu partidonan na Hulanda pa forma gobierno
DEN HAAG – Sondeador Plasterk a continua awe diahuebs cu combersacionan cu demas lidernan politico Hulandes cu a haya asiento den e ultimo eleccion. Plasterk ta papia awe cu Jetten (D66), Van der Plas (BBB), Bontenbal (CDA), Marijnissen (SP), Baudet (Forum voor Democratie) y Ouwehand (Partij voor de Dieren). Ta e intencion cu otro siman e ta presenta su relato na Tweede Kamer.
Sondeador Plasterk a cuminsa reuni cu partidonan politico na Hulanda
DEN HAAG – Lider di partido PVV Geert Wilders kier pa su partido sinta na mesa cu partidonan BBB, NSC, VVD. Despues di su combersacion cu e sondeador Ronald Plasterk, Wilders a bisa cu e no mester ta pa ki tipo di gabinete ta bin of kit area cada persona ta haya. Segun e, no mester tin taboe riba esey aworai. “Mi preferencia ta pa un gabinete mayoritario, of uno minoritario. Papia cu otro, kita e peso di mesa. Wak si bo tin similaridadnan di programa y si bo ta confia otro” Wilders a sigui bisa. Plasterk a papia cu demas lidernan politico di e partidonan mas grandi cu a haya asiento. Aki un siman, e tin cu presenta resultado di su sondeo.
Mas intercambio di studiante den Reino pa medio di Koninkrijksbeurs
DEN HAAG/ ORANJESTAD - Entrante otro aña di estudio, mas of menos 120 studiante pa aña por bay pa intercambio of stage den Reino pa medio di e asina yama Koninkrijksbeurs. Esaki ta un programa nobo di mobilidad pa tur studiante den Reino, cu ta enfoca riba aumenta e intercambio di studiante pa termino cortico. Recientemente, e prome cinco studiantenan Caribense a cuminsa na Hulanda cu un Koninkrijksbeurs. Pa e aña di estudio aki, ta spera cu mas of menos 25 studiante lo haci uzo di esaki. Koninkrijksbeurs ta un di e medidanan pa yuda studiante Caribense den nan carera di estudio.
Ex minister Plasterkt ta e sondeador nobo pa forma un gobierno Hulandes nobo
DEN HAAG – Ex minister Hulandes Ronald Plasterk a keda apunta como e sondeador nobo pa un gobierno Hulandes nobo. Manera cu noticiacla a raporta ayera, tabatin intencion pa Plasterk bira e sondeador nobo. Tur partido envolvi a bay di acuerdo pa Plasterk asumi e tarea aki, caul e ta inicia mayan. TA e intencion cu pa aki un siman e bin bek cu un relato pa despues e formacion pasa den su siguiente fase. Plasterk a bisa caba cu e no ta kere cu e formacion mester tuma hopi tempo.
Follow NoticiaCla
