Heerenveen: InselAir lo protesta aumento di airport tax atrobe

WILLEMSTAD – E compania InselAir International lo bringa e proceso pa aumenta airport tax atrobe, cu Curacao Airport Partners (CAP) a sugeri. Esaki un di e gerentenan general di e compania Edward Heerenveen (Chief General and International Affairs) a sigura NoticiaCla.com. Heerenveen ta sigura cu bo no por ‘aumenta un tax di awe pa mayan’. “Bo no por hacie pasobra tin reglanan pa esey”. Como tal, manera cu nan a haci den pasado, nan lo bringa esaki, pasobra cada aumento asina, ta trece un problema pa e aerolinea y gastonan extra pa e clientenan. E aumento aki lo afecta Aruba tambe.

NO POR SIN MAS

NoticiaCla.com a acerca e gerente mirando e aumento proponi, (cu mientrastanto a wordo presenta oficialmente siman pasa diabierna na Corsou). Segun Heerenveen, pa por haci algo asina, mester tin consultative ronden, esta, invita tur aerolinea cu ta bula pa Corsou, invita IATA, ICAO. Esey ta debi na leynan cu a firma y cu ICAO ta bisa cu cada aumento den airport mester tin un ‘consultatie ronde’. Ademas, e compania mester pone tur su cifranan financiero pa tur hende por mira cu bo tin cu his ‘e pasobra cos no ta bay bon. Algo cu Curacao Airport Partners (CAP) no a haci nunca segun Heerenveen.

SCONDE CIFRA

Heerenveen ta sigura cu e airport di Corsou ta haciendo ‘boekenwinsten’ pero cu nan ta scondie pa hende no haya sa cuanto nan ta ganando. “Nunca nan no a bin dilanti cu nan cifranan, pa ningun hende wak ni e waakhond (BTPU) cu ta mira si e prijsnan ta realistico.

CIRCULO VICIOSO

Ora cu bo hisa e prijs manera cu a programa, e ta bay tin su efecto segun Heerenveen. E ta duna un ehempel di un pasashi pa Bonaire.”Aworaki un tarifa mas barata pa Bonaire ta costa 170 florin. Riba esey ta bin 36 dollar. E hendenan ta cuminsa grita cu e ticket di Insel Air ta caro. Pero nos ticketnan ya caba ta satura cu taxes”. Pa ora cu un hende bay paga 300 florin pa un ticket, e ta rabia riba Insel Air siendo cu e prijs ta 170 florin, segun e gerente. “Nos a splica esey masha hopi mes. E resultado ta cu bo tin un prijsenelasticiteit. Cada bez bo subi e prijs, menos hende ta bay biaha of nan ta bay biaha menos biaha”. Y cu esey, menos hende ta bay airport cu ta pone cu airport tambe ta haya menos placa. Tur ta parti di e circulo vicioso. Loke cu Heerenveen tambe ta contra ta cu e placa cu e aeropuerto gana, ta bay Brazil. E placa cu aeropuerto di Aruba gana, ta keda Aruba y ta wordo uza pa drecha Aruba. Esun di Corsou no. Algo cu Heerenveen tin basta problema cune.

REACCION ARUBA

Segun minister encarga cu Turismo, y responsabel pa aeropuerto na Aruba Otmar Oduber, e aumento di airport tax, ta un responsabilidad di cada pais. “Den caso aki tambe di e aeropuerto di Corsou, si nan ta sinti esaki necesario” Oduber a bisa. Cada aeropuerto cu ta haciendo inversionnan segun e mandatario, incluyendo Corsou, ta haci esaki como un di e consecuencianan, esta aumenta airport tax. E ta conoci cu e tarifanan cu Corsou ta cobra, ta mas abou cu loke Aruba ta cobrando. Como tal, segun Oduber, ta logico cu nan (Corsou) lo kier haci esaki na e mesun nivel cu e.o. Aruba.