Minister Arends riba sentencia contra Embassy Suites: “Ningun hende ta riba ley!”

ORANJESTAD – “Ningun hende ta riba ley”, tabata e prome reaccion di minister di medio ambiente Ursell Arends riba e veredicto awe mainta di corte cu a prohibi construccion di e beach dilanti Embassy Suites. “Mi ta mantene simple. 1. Ningun hende ta riba ley. 2. Naturalesa no ta contra progreso... pero tampoco por ta victima” e mandatario a bisa den poco palabra, pero bisando tur cos. Por compronde aki cu e mandatario ta nifica aki cu Embassy Suites no ta para riba ley y como tal mester tene nan mes den margen di ley. Mester bisa mesora si cu no ta e minister aki ta esun cu a duna e permiso di construction di e beach, sino cu e tabata esun cu mester a duna e ‘ontheffing’ rekeri pa por a traha e beach. E di dos parti, ta referi na e hecho cu e hotel kier traha un beach, como progreso di e proyecto, pero pa logra esaki, e naturalesa ta bira victima di e intencion. Y esey segun e minister, ta algo cu no por. E minister a informa cu lo duna mas informacion durante curso di dia, mirando cu e tabata poco ocupa ora cu e la duna e prome reaccion pa noticiacla. NOTA: E potret ta di archivo di Noticiacla di tempo cu e minister en cuestion a vocifera su opinion ora cu huez a para e trahamento di e beach na july di e aña aki.