Na Corsou, partido PIN ta uni cu partido MAN

Na Corsou, partido PIN ta uni cu partido MAN

Posted on 11/15/2023 10:46 am AST | Updated on 11/15/2023 11:16 am AST

WILLEMSTAD - Riba tereno polítiko tin moveshonnan interesante. I un movida ku a kue hopi hende fo’i base ta e integrashon di PIN den MAN. E siman aki a bira konosí ku e dos movementunan polítiko aki lo bai integrá, naturalmente ku bista riba e próksimo elekshon di 2025. Manera ta konosí kaba, partido MAN tin komo lider polítiko sra. Giselle Mc William, miéntras ku PIN ta enkabesá pa sra. Suzy Camelia-Römer. Niun di dos mester di introdukshon.

Segun analistanan polítiko, e movida aki lo fortifiká partido MAN, prinsipalmente e liderazgo. Ultimo añanan e partido no a pasa den su mihó tempunan i mester a batayá meimei di algun kontroversia ku a redundá den kambio di liderazgo. MAN a bai atras drástikamente den kantidat di voto den e último elekshon, i investigashonnan a konkluí ku e partido dado momentu a bin pèrdè e toke ku pueblo. Kontroversianan rònt dje persona di Steven Martina sigur no a yuda e kousa.

Pa loke ta partido PIN, pa un márgen chikí den e kantidat di voto e partido no a logra asiento pa por a forma parti di gobernashon. Den e okashon ei PIN a ser honrá ku 3.733 voto, miéntras ku MAN a haña 5.463 voto, bon pa 2 asiento.

Segun analistanan polítiko, tantu sra. Mc William komo Camelia-Römer a traha huntu kaba den senonan di Partido Nashonal di Pueblo, pues nan sa kiko nan tin na otro kaba. Pero aparentemente tin palabrashonnan hopi kla riba posibel resultado di e próksimo elekshon. Camelia-Römer lo opta pa bai den Parlamento i lo no asumí ningun funshon ehekutivo (minister). E integrashon aki ta intenshoná pa fortifiká otro, aunke pa Manistanan e lo ta un bon manera tambe pa ‘boost’ e imágen di Mc William komo un lider. Amigu i kontrinkantenan polítiko ta rekonosé ku e ta profilá di forma ekselente komo parlamentario, pero otro ta ora bo tin di karga e batuta di lider polítiko. Camelia-Römer a pasa e prueba ei kaba, i ta keda demostrá ku spesialmente komo hende muhé bo mester tin un karakter fuerte pa gana rèspèt di esnan ku tin di uni den e lucha.

Mester informá ku awe tardi e dos partidonan a keda di tene un konferensia di prensa na sede di MAN pa hasi e anunsio ofisial. NOTA: E texto ta scirbi den Papiamento fonetico di Corsou.

  • Powered by SETAR