Debi na presion di Merca, Gobierno Hulandes ta para plan pa reduccion di buelo na Schiphol

SCHIPHOL – E plan pa reduci e cantidad di buelo na Schiphol otro aña ta ‘on hold’ por lo pronto. Esaki despues di protesta di comision Europeo riba e tema y tambe Merca cu no ta haya ta husto cu como consecuencia, ta prohibi un di su aeroliñanan (jetBlue)  di baha na Schiphol. E tabatin intencion di den forma reciproca, prohibi KLM di baha tambe na Merca, of reduci e cantidad considerablemente. Dialuna gobierno di Hulanda y Merca a reuni cu otro riba e tema y despues gobierno Hulandes a dicidi di recapacita. Segun e minister encartga, Harbers, a bisa cu despues di e posicion di Comision Europeo, e mester a reevalua e situacion. Esey kier men cu e regla di reduci buelo entrante 31 di maart 2024 no ta sigui. E intencion tabata cu den e prome fase, lo a reduci e cantidad di buelo na 460 mil pa aña, en espera di e di dos fase. KLM a reacciona positivo riba e noticia, cu ta nifica cu no ta bay corta den nan cantidad di buelo pa Merca por lo pronto.