Corte a prohibi Embassy Suites pa traha beach dilanti e hotel

ORANJESTAD – Corte diaranson mainta via un veredicto a prohibi e hotel  Embassy Suites pa traha e beach dilanti nan hotel, y mes momento ordena gobierno pa revoca e asina yama ‘aanlegvergunning’ pa e beach aki. E motibo principal ta cu e ta viola e regla di un asina yama Ruimtelijk Ontwikkelingsplan met Voorschriften esta un ROPV, unda cu segun esaki, no ta permiti un beach pa wordo crea, pasobra e ta destina pa un parke marino cu tin otro exigencia y regla. Y construccion di e beach aki, no ta cay bou di e stipulacion di e ROPV.  Ademas huez ta dicta cu e minister no tabata mag di otorga e permiso di construccion di e beach y como tal a dicta cu gobierno mester  revoca e permiso ey. Esaki kier men cu e fundacion Aruba Birdlife Conservation ta gana su caso unda cu huez a hustifica nan ‘obhecion’ contra dunamento di e permiso di construccion di e beach. 

E BEACH 

Mester bisa cu e compania responsabel pa e hotel, esta Natura Development a cuminsa traha e beach for di juni di e aña aki y despues a haye ta para esaki ora cu a haya orden di corte, ora cu e mesun ABC a protesta contra e proyecto aki. E momento ey, Natura a bay di acuerdo pero a bisa si cu tin chens cu e hotel ta bay sufri, mirando cu a mercadea e hotel internacionalmente cu un beach y sin e beach, e hotel no por draai, y cu esaki lo nifica perdida financiero grandi pa e compania. Y no ta descarta cu nan lo por bin cu un caso di daño y perhuicio contra pais Aruba pa e hecho cu awor a para e construccion di e beach, via un decreto di corte. 

Por lesa e sentencia completo AKI.