Un partido politico nobo ta presenta su mes diamars awor

ORANJESTAD - Aruba ta haya un partido politico acerca, cu ta hiba e nomber ‘ABO’ 'Aruba su Bienestar Organisacion'. E partido ta presenta su mes diamars mainta, publicamente, bou di liderazco di e conocido ciudadano y ex politico Elton Lioe-A-Tjam como presidente. Segun Lioe-A-Tjam, ABO ta un organisacion dirigi riba comunidad, unda e individuo ta para central.

E PARTIDO

Ta un grupo di ciudadano dedica y preocupa a lanta e organisacion aki cu e unico proposito: yuda transforma e comunidad den un sociedad positivo y harmonioso, den cua derechonan individual, opinion y desaroyo personal ta balora, respeta y stimula.

PRINCIPIO

E organisacion aki ta considera principionan democratico, participacion di comunidad y apoderacion di e individuo como propiedadnan importante cu ta necesario pa crea un sociedad mas consciente, mas husto y mas responsabel.

VISION DI E PARTIDO

Nos ta un movemento politico responsivo, responsabel y cu un base amplio, cu ta visualisa un sociedad civil husto, prospero, pacifico, comprometi y apodera, hancra riba igualdad social, un mercado economico vigoroso, politica habri, ekilibrio ecologico y un gobierno honesto y efectivo.

SOCIEDAD ACTIVO

E partido ta boga pa un sociedad activo cu por tene esunnan na poder responsabel, un comunidad den cua nos constitucion ta brinda beneficionan palpabel pa tur hende, specialmente pa esunnan cu ta biba den forma marginal y pa crea un sociedad den cua ciudadanonan informa y activo ta soberano.

DIRECTIVA

E directiva di e partido ta consisti di e.o. Elton L. Lioe-A-Tjam, presidente, Daniel A. van Heyningen, tesorero, Venancio A. Connor, secretario, Seferino A. Isabella, miembro, Jose Manuel Vieira Alves, miembro.Esnan cu kier mas informacion por subi nan website http://www.aboaruba.org