Fitch a degrada Aruba pa BBB- y wanta perspectiva stabil

ORANJESTAD – E agencia di credito internacional Fitch Ratings diaranson a down grade Aruba di BBB pa BBB-, y e perspectiva ta keda stabil (lesa e rapport aki). Un di e motibonan principal, segun prome reaccion di minister di finanzas saliente Juan David Yrausquin, ta e sierra di refineria Valero. Fitch a degrada mas aspecto di Aruba, manera e plafond di BBB pa A-, y e Ratings Outlook di e IDR di largo duracion di BBB pa A-. Segun Fitch, e solvencia di credito di Aruba a deteriora desde 2009 debi na e impacto negativo di e suspencion di operacion continuo di e refineria Valero, y esey ta ilustra e structura economico estrecho, y su vulnerabilidad pa cu choque nan externo.

Ademas e enfoke di gobierno pa reacciona riba e estimulo fiscal riba cierto reduccion di impuesto selectivo, aumento di payroll di gobierno y aumento di compromisonan pa futuro riba e asina yama PPP, a acentua e problemanan di presupuesto y aumenta e reto pa reduci e imbalance fiscal largo y e peso di e aumento den finanzas publico.

E deficit presupuestario di Aruba, -segun Fitch-, a conoce un subida den debe publico di 40% pa 60% di e GDP, cu ta hopi mas cu e 39% cu ta e base pa ta den un categoria di rating BBB. Pago riba interes di e debe, ta programa pa aumenta te 17%, cu ta double e 8% pa por keda den e rating BBB. A desvia di tal forma di e metanan oficial, a pone cu a perde confiansa den e compromiso di gobierno pa cu e consolidacion fiscal. Fitch ta reconoce tambe e hecho cu gobernador di Aruba a cay aden y pidi e secretariado di College Financieel Toezicht pa evalua e posicion fiscal di Aruba prome cu e firma e presupuesto. Den siguiente raportahe, lo sigui detaya e splicacion mas extenso di Fitch riba e situacion fiscal di Aruba.