DUCAPRO: Ora aña bolter, mester cuminsa paga pa usa musica di forma comercial

ORANJESTAD – Entrante 1 di januari 2024, tur instancia comercial (no solamente radio) mester paga pa uso di musica. E siman aki a notifica tur usuario di musica comercial (no solamente radio) cu comienso di aña 2024 e uso di musica lo ta illegal si no ta dispone di un licencia di Ducapro. Ta bon pa remarca cu no ta solamente authornan y compositornan local ta wordo representa sino e 'world repertoire; a traves di BUMA-STEMRA, kiermen tur artista internacional. Tur compania cu ta cay bou di esaki, tin te dia 24 di november pa confirma cu nan voluntariamente lo opta pa e licencia comercial. Tur esnan cu registra, lo haya un bishita pa por regla nan asuntonan corecto pa ora cu aña habri, nan por sigui toca musica sin problema. Esnan cu opta pa no participa, lo por haya nan cu consecuencia legal si nan toca cancionan di artistanan international y esunan local cu a registra.

DUCAPRO Y BUMA-STEMRA 

Na anja 2018 ora Ducapor a anuncia cu lo cuminsa cu e systema di royalties e radiostations di Aruba a core bai Hulanda y a anuncia cu nan no lo bai cu Ducapro sino cu BUMA-STEMRA. Pero a bira conoci cu DUCAPRO ta traha awor hunto cu BUMA-STEMRA, pues aki no tin ningun problema. 

PAGO

Ta depende di e lugar cu ta toca e musica, cuanto e tin cu paga pa luna pa e licensia. Tambe ta bon pa remarca un biaha mas cu no ta solamente radio emisoranan ta cay bou di e regla aki y cu tin cu cuminsa paga un suma mensual, sino otro lugarnan cu ta toca musica den nan establecimento. Hotel, bar, restaurant, cafe, gym y otro facilidadnan ta djis algun pa menciona.