Minister ta desaproba actuacion di gerente di supermercado

ORANJESTAD – “Masha mahos mes pa mira a (mal) trato aki sosode na Aruba”. Asina minister di Labor Paul Croes a reacciona serca NoticiaCla.com riba e actuacion di gerente di e supermercado Ling & Sons contra su trahadonan. Riba un video por a mira con e gerente recientemente tabata grita y uza palabranan malo contra un grupo di trahado cu kier of a pone trabou abou recientemente. E mandatario a mustra su desaprobacion total y a duna orden pa Departamento di Labor interveni den e caso aki (di Ling & Sons).

INSPECCION

Segun Croes, e departamento concerni lo hasi un inspeccion pa mira kico ta e origen di e escalacion aki. Lo consulta tanto doño di trabou como e trahadonan. “ Si tin necesidad pa afdeling conflicto duna asistencia mas profundo lo hasi esaki tambe” e mandatario a bisa.

SORPRENDI

Riba su reaccion mes, e mandatario a sigui bisa “ Mi a keda masha sorprendi y desapunta pa e forma con a meneer aki tabata trata cu e trahadornan. E no ta demostra goed werkgeverschap, cual ta un requisito stipula den nos leynan laboral”. E mandatario a sigura cu inmediatamente e la tuma contacto cu Director di Labor sr. Nick Kock y tambe mediador di Gobierno sr. Anselmo Pontiluis pa e asunto aki.

VIDEO

E video ta mustra claramente con e gerente ta grita e insulta e trahadonan y yama nan pa tur sorto di cos, y hera dal nan tambe. Ta un colega hulandes a bin kita e persona aki pa e no continua cu su gritamento pa cu e trahadonan. Foto ta saca di e video unda cu e gerente (camisa blauw) ta insulta un di e trahadonan.