Un banner a hera causa walkout na dept. huridico di gobierno

ORANJESTAD – Un banner gigantesco comercial tabata motibo di un malcontento laboral awe mainta na departamento di DWJZ (Dienst Wetgeving Juridische Zaken), cu por poco a comberti su mes den un ‘walk out’. Cu intervencion spontaneo di minister di infrastructura Benny Sevinger, e walkout a wordo para y ta warda solucion. E problema, ubicacion di un banner gigantesco di e compania Athletes Foot, den caya grandi, tabatin e trahadonan di e departamento di gobierno disgusta. E minister a priminti intervencion y un posibel solucion.

DIRECTOR DWJZ

Den combersacion cu e director di e departamento legislativo, Guito Croes, e la splica NoticiaCla.com cu e trahadonan no ta nada contento cu e compania Athletes Foot a pone e banner asina grandi. E ta tapa bista di e oficina huridico, ta haci desordo ta tapa e entrada di seguridad den caso di emergencia. Pa dos siman caba e banner gigantesco ta poni, y a purba ,-en vano-, desde e tempo ey, pa busca autoridad pa un solucion.

WALK OUT

E intencion tabata pa e trahadornan tene un walk out awe mainta, pero un conferencia di gobierno den cercania, a evita esey. E trahadonan, tumando nota di e conferencia, a dicidi di mobilisa pa e area ey y a confronta nada menos cu prome minister Mike Eman na e sitio. Eynan nan a comparti nan malcontento, y na su tempo, Eman a pasa e situacion pa su colega Benny Sevinger. Sevinger a dicidi di tuma accion y mobilisa mesora pa e sitio en cuestion.

BISHITA EDIFICIO

E mandatario hunto cu e personal, a subi den e edificio y por a mira cu su propio wowo, e situacion di e trahadonan. Despues e mandatario a reacciona, bisando cu e ta sostene e inquietud di e trahadonan y cu e lo atende e asunto mesora. Segun Sevinger, e prome cu tin cu atende cune, ta FCCA cu ta doño di e edificio, conoci como ‘ex’ Interbank den Caya Betico Croes. Sevinger a mustra cu e tin cu check cu FCCA si nan a sera un of otro acuerdo cu e negoshi doño di e banner, esta di Athletes Foot. Si e ta un acuerdo entre FCCA y e compania, FCCA tin cu responsabilisa su mes pa e caso aki. Si ta diferente, e negoshi mester duna cuenta y splica kico e intencion tabata. E hecho ta cu e mandatario no ta di acuerdo cu e banner poni eynan y a sigura cu e lo tuma paso, den e reunion cu su infrateam, cu tabata programa pa awe mainta mes, pa casualidad. NoticiaCla.com a compronde cu e negoshi a pone e banner riba dia di obrero, un dia liber, cu a pone cu ningun hende no tabatey pa mira e situacion e momento ey. NoticiaCla.com a tuma contacto cu e doño di e negoshi, pero a compronde cu nan ta den exterior pa un biahe di trabou.