Avion daña di KLM ta bula bek awe tardi mes pa Hulanda

ORANJESTAD – Si tur cos ta bon, awe tardi 2’or e avion di KLM cu a confronta problema den weekend, ta bula bek pa Hulanda. Segun gerente di KLM na Aruba Danilo de Freitas a confirma na NoticiaCa.com, e pieza di e avion a yega ayera caba y a cuminsa traha riba dje mesora pa e keda drecha. E pasaheronan di e buelo di weekend, mientrastanto a haya ayudo caba segun de Freitas.

ASISTENCIA PA PASAHERO

E pasaheronan cu mester a bolbe Hulanda, a pasa un anochi na Aruba y a wordo poni den hotel, y esnan cu tabatin destinacion bonaire, a wordo poni riba un avion charter di Insel Air, segun de Freitas a confirma awe mainta. E intencion tabata pa e pasaheronan pa Hulanda, biaha ayera mes. Pues tur cos a ‘keda regla’ miho cu ta posibel bou di e circumstancianan miho posibel.

E SUSESO MES

Manera ta conoci, diasabra alrededor di 4:20pm a activa cuerpo di bombero pa un avion Airbus 330 di e aerolinea KLM cu tabata yegando Aruba for di Hulanda cu problema cu un di su motornan. Aeropuerto a informa central di alarma di cuerpo di bombero cu e avion tabatin 206 pasahero abordo y cu tabatin un "leak" di combustibel den motor number 1. E avion a aterisa algun minuut despues, sin problema.

ALARMA ACTIVA

Manera semper ora di un alarma na aeropuerto, cuerpo di bombero ta activa su sistema mesora y ta manda yama bomberonan for di cas y for di e otro kazernenan pa reforsa e ekipo na aeropuerto. Tambe a conta cu 3 ambulance na e kazerne, den posicion "stand by". 

CONTROL

Asina cu e avion a aterisa, Bomberonan a compañe riba pista y eynan a nota cu e motor number 1 di berdad tabata "leak" azeta, riba henter e trayectorio riba rampa. A staciona e avion na posicion number un riba plataforma di aeropuerto, mientras Bomberonan a spuit foam riba e combustibel cu a basha riba pista. Esey pa evita cualkier chispa cu por causa un candela. Tambe bomberonan a inspecciona y controla e avion pa siguridad di e pasaheronan. Asina cu a "shutdown" tur sistema, a declara e situacion "safe" y consecuentemente a cancela e alarma.