Enbez di entrega proyecto Wilhelminastraat, a anuncia retraso di un siman mas

ORANJESTAD – Envez di entrega e proyecto awe diabierna, 10 di November 2023, DOW a anuncia cu contratista a bisa cu falta por lo menos un siman mas di trabou pa keda cla cu e proyecto di Columbusstraat/Wilhelminastraat. E problema ta scarsedad di klinker pa por a caba e trabou. E contratista a bisa DOW cu mester di por lo menos 5 dia di trabou pa por caba e proyecto. 

NO A KEDA CLA

“Lamentablemente e contratisa a informa nos cu e compania cu mester a entrega nan klinkers no tin mas disponible na e momento nan ki pa asina nan caba cu e trabou” DOW a anuncia riba nan pagina di Facebook diabierna merdia. “Awe diabierna e compania lo entrega e resto di e klinkers nan pa asina e contratista por caba cu e trabou” e mensahe a sigui bisa. “ Nos a compronde for di e contratisa cu nan mester 5 dia mas di trabou (werkdagen) pa asina nos por habri e caminda.Nos ta lamenta e situacion y manera nos tin mas informacion nos lo informa comunidad di Aruba” e mensahe di DOW ta finalisa bisando.

MINISTER

Minister encarga cu e proyecto, Geoffrey Wever tabatin tur speransa cu e lo a habri e proyecto awe atrobe, kitando tur dolor di cabez di e comerciantenan afecta. Segun e mandatario a anuncia, cu tempo permiti, lo habri e proyecto awe diabierna. Sinembargo no tabatin mal tempo, tabata solo solo, y asina mes e proyecto atrobe a conoce un retraso. Un retraso di un siman, pa motibo di scarsedad di klinker.