Trahadonan di Arubus a bay den accion pa protesta

ORANJESTAD – Trahadonan di Arubus a bay den un accion di 2 ora pa protesta falta di atencion di gerencia y gobierno riba nan asuntonan di trabou. Presidente di sindicato SEPPA Magaly Brito a splica Noticiacla cu ta wardando basta tempo riba conclusion di un rapport traha independientemente riba e.o. structura salarial y e relacion entre sindicato y gerencia. Supuestamente e rapport aki mester ta cla masha tempo pero gerencia aparentemente lo tin e rapport aki wanta of scondi y no kier presenta esaki. Ademas, a haci promesa na e trahadonan cu debi cu gobierno recientemente a raporta un surplus, cu parti di e placa aki lo por bay pa nan, pero te ainda no a tende nada di esaki. Segun Brito, ora cu Arubus a bay plat, mesora a pidi un reunion, cu lo tuma lugar diamars awor. Si pa diamars awor no tin claridad, lo continua y intensifica e accion. Mester bisa cu e asunto ta data di 2021 bin ariba, unda cu e trahadonan ta wordo wanta na liña segun e sindicato.