Prome cuartal di 2024 tin sentencia riba caso matrimonio mesun sexo

DEN HAAG – E veredicto di Corte di Casacion riba e caso di matrimonio di mesun sexo pa Aruba y Corsou, ta bin den prome cuartal di 2024. Presidente di Corte di Casacion mr Polak diabierna mainta a indica cu algun siman despues cu e Procurador General duna su conseho, Corte di Casacion lo duna nan veredicto final. PG a bisa tambe cu e tin pensa di duna su conseho dia 19 di januari 2024. Y ta conoci cu pa casi 98% di biaha, Corte di Casacion ta tuma e conseho ey integralmente over. “Algun siman despues di ricibi e conseho di PG, e Corte aki lo duna su veredicto final. Esaki sin en caso algun hende a kere cu awe mes lo a bin un sentencia” Polak a clarifica na esnan presente den e sala di Corte. E la admiti cu tabata un caso hopi dificil y compleho y cu ta afecta hopi hende y sigur na Aruba y Corsou. Como tal lo tuma un bon bista riba e loke a keda presenta awe y den 2024 por spera un sentencia. Si e sentencia keda igual na e sentencia di December 6 di 2022, esey kier men cu Aruba y Corsou mester habri matrimonio di mesun sexo. Si dicta otro, esey kier men cu ta keda na cada gobierno con pa anda cu e tema despues.