Heering: Den caso di matrimonio mesun sexo, corte a viola e separacion di poder

AMSTERDAM – E punto no ta asina hopi si Aruba ta pro of contra matrimonio di mesun sexo (den corte di casacion:red) sino ta bay mas pa e separacion di poder y si hof a viola esaki of no. Asina abogado pa gobierno di Aruba mr Heering a debate den e corte diabierna mainta na Den Haag. Segun e abogado, e pensamento di Aruba ta cu huez aña pasa a bay sinta riba stul di gobierno, y esey no ta bon. Durante e defensa di por lo menos 9 pagina, e abogado a sigui splica cu pa Aruba ta e separacion di poder ta mas importante y ta den wega. E di dos parti ta e parti incidental.   Aruba ta pensa cu hof a subestima e separacion di poder den e caso aki y a trata e tema mucho facil. Hof a comete tres fayo haci segun Heering unda cu entre otro e huez no por proporciona e asunto aki.   Ademas, e huez mester ta cuidadoso y tin cu pisa e interes miho. Y aki ta papia di dos interes. Di dos fayo cu hof comete segun e abogado pa Aruba, ta e fayo di interpretacion. Hues ta bay mucho leu den su interpretacion. E di tres fayo, cu ta esun mas importante,ta unda cu e huez a ignora cierto parti di e ley completamente. Tambe cu Corte pa error, no a mustra ningun moderacion den e caso aki y a bay basta leu den duna e situacion un forma incorecto. Cu esaki a bay sinta riba un stoel, mientras cu e stoel ta ocupa caba, esta pa gobierno. Tambe corte a tuma e tema aki mucho leve y a subestima e tema aki. E sentencia ademas ta impugna cu statuut di Aruba. Corsou su abogado Chris Peterson tambe a hiba defensa pa e isla ruman, unda cu basicamente a bisa cu Corsou no ta cla pa introduci matrimonio di mesun sexo. Ademas Corsou mester por expresa su mes y esaki no a sosode ainda (posiblemente pa un referendum). Hopi di e argumentonan di Corsou, tambe por wordo haya bek den e defensa di abogado Heering di Aruba. E caso ta continua awe mainta. Notable ta un grupo basta grandi di Arubiano presente cu a biaha pa Hulanda specialmente pa e caso aki di awe diabierna. Tanto di Aruba como di Corsou tabatin personanan sinta den e publico pa presencia e caso personalmente. Entre nan por a mira representantenan di fundacion Orguyo di Aruba.