Huez a aproba pa scucha mas testigo den caso Flamingo, incluyendo Marisol Lopez Tromp

ORANJESTAD – Mientras cu hues diahuebs mainta a rechasa e peticion di varios abogado pa ‘wanta’ e caso Flamingo debi cu mester di mas tempo pa prepara, e la permiti si mayoria di e peticion pa scucha mas testigo den e caso. Asina mes e la bisa si cu no ta mira necesidad pa scucha ministernan actual manera Prome Minister Evelyn Wever como testigo. Uno si cu e la aproba ta actual parlamentario Marisol Lopez Tromp pa wordo scucha den caso di algun di e sospechosonan. Abogado di sospechoso Otmar Oduber tabata contento di e resultado di awe, ya cu segun e, cu e interogacion di e sospechosonan, lo trece hopi claridad den e caso di su cliente y demonstra cu su cliente no a haci nada malo. 

TESTIGO 

Den caso di sospechoso Otmar Oduber, e huez a permiti pa scucha 30 di e 35 testigonan cu a wordo pidi pa scucha. Esaki pasobra ta den interes di e caso y e testimonionan por duna un lus riba esaki. E la pasa e caso e ora pa e despacho di Huez Comisario pa e atende cu esaki. Abogado di Oduber, Vito Carlo a pidi pa añadi documentonan na e caso, riba cual huez a bisa cu ta posibel contal nan ta relevante. Sospechoso Esser tambe por scucha e 9 testigonan cu e la pidi. E sospechoso di fam Wever-Croes a wordo permiti pa scucha su 5 testigonan. Y e yiu homber di Oduber, J. Oduber a haya permiso pas scucha 3 testigo. Y finalmente e sospechoso Phillips tambe a wordo permiti pa scucha su 2 testigonan, entre nan parlamentario Marisol Lopez Tromp. 

MARISOL LOPEZ TROMP

Despues di e caso, a compronde cu sra Marisol Lopez Tromp su declaracionan lo por ta determinante pa e continuacion di e caso, sigur segun opinion di e abogado di sospechoso Oduber. Remarcable ta cu huez mes ta esun cu a sugeri pa scucha Lopez Tromp pa asina saca afo kico ta berdad y kico no, ya cu hopi di e declaracionan ta drei rond di acusacion di Lopez Tromp den e caso Flamingo. 

SUSPENDE E CASO

Huez a suspende e caso pa tempo indefini, pa asina e trabou por continua di investigacion, interogacion di e sospechosonan y mas. Riba un fecha ainda desconoci, huez lo yama partidonan bek pa un update di e caso Flamingo. 

E CASO

E caso ta trata denuncia haci pa e.o. Marisol Lopez Tromp contra ex minister Otmar Oduber y varios otro persona incluyendo su propio yiu homber, pa corupcion pa loke ta otorgamento di tereno tempo cu Oduber tabata minister di infrastructura.  NOTA: E potret di noticiacla ta di awe mainta na salida di e sospechoso Oduber for di corte, cu su abogado Vito Carlo.