Ecotech Freezone: A invita Stichting Parkietenbos Aruba pero nunca a bin wak nos facilidad

ORANJESTAD – Gerencia di Ecotech Freezone a reacciona algun dia despues cu fundacion Parkietenbos a habri contra e situacion na Seroe Teishi, pidiendo publicamente pa para e loke ta sosodiendo eynan. E compania na cual e fundacion a dirigi nan keho, a reaccion y a diamars a bisa cu nan ta sorprendi y ta lamenta cu Sr. Aldrich Croes, como presidente di Stichting Parkietenbos Aruba (SPA), a emiti un comunicado  caminda un biaha mas ta atacha directamente tur e trabounan cu e empresa local, Ecotech Freezone, a eherce na bienestar di Pais Aruba.

INVITACION PA STICHTING PARKIETENBOS

Segun e compania, nan a invita Stichting Parkietenbos Aruba na varios ocasion pa libremente inspecciona delaster un skina y buraco na Ser’i Teishi pa asina nan mes constata cu no tin nada di holo malo, pero te dia di awe nan a scoge pa no presenta. Ta varios instancia local y internacional, ambos di sector priva y publico, a haya un tour completo di tur locual ta haci na Ser’i Teishi. Varios di e mesun expertonan aki a keda asombra di mira con bon e operacion ta cana y riba dje conforme reglanan Europeo, unda cu nan mes no por a imagina cu na Aruba nos tin un maneho asina profesional y limpi den procesa desperdicio.

PAGA REGULARMENTE PA AUDIT

E compania a sigui bisa cu ta bon pa enfatisa cu nan, esta Ecotech Freezone, regularmente ta paga companianan internacional pa “audit” nan operacion completo, e protocol cu ta efectua den maneho di envirobales, con ta dera nan, etc. Tur e rapportnan aki ta bay bek na Gobierno di Aruba y Serlimar, pa demostra tur esfuerso cu ta haci pa tin un operacion sostenibel, eficiente y bon pa medio ambiente. 

STICHTING ATROBE NO A PRESENTA 

Stichting Parkietenbos Aruba a haya un invitacion directamente for di gerencia di Ecotech Freezone pa nan tambe presencia e trabounan riba Ser’i Teishi dia 6 di october 2022 y ayera atrobe, dia 5 di november 2023. Pero, lamentablemente na ningun di dos ocasion Stichting Parkietenbos Aruba a presenta! 

VARIOS RETO

Segun e compania, no por keda sin remarca cu e dump na Parkietenbos tin varios reto ainda. Pero, Ecotech Freezone a sigura cu nan no ta causa di e problema. “Ta lamenta pa mira con un fundacion manera Stichting Parkietenbos Aruba ta emiti un comunicado cu acusacionnan y insinuacionnan sin base, dañando e bon nomber di e empresa local, cu tin como meta pa asisti Pais Aruba den e proceso di desperdicio” e compania ta finalisa bisando.