Dowers: Prohibicion pa core auto cu stuurwiel man drechi

ORANJESTAD – Gobierno di Aruba lo bay prohibi autonan cu stuurwiel na man drechi, pa core na Aruba. E motivacion ta e cantidad di accidente cu ta sosodiendo cu e autonan aki, specialmente esnan grave of fatal. Den e ultimo añanan a nota un crecemento den importacion di autonan cu stuurwiel na man drechi. Hopi di nan ta bin di e autonan aki, cu sea ta core mucho duro of ta carece di bon visibilidad riba caminda. Cu esey den mente y saliendo for di e punto di bista cu nos trafico ta basa riba e principio di core na man drechi di caminda, a cuminsa e proceso pa actualisa e "landsbesluit voorschriften voertuigen" di aña 1999.

CAMBIO DI LEY

Minister di Husticia Arthur Dowers a instrui su huristanan pa presenta un nota di cambio den e decreto gubernamental. E prome ta cu ta subraya cu ora papia di "stuurinrichting" cu ta sigui skirbi su tras cu e stuur mester ta na man robes, mira for di e perspectiva di e chauffeur. Tambe cu e cambio ta drenta na vigor na e siguiente fecha pa keur bo auto, pues si bo a caba di keur awo, bo por core dos aña mas, pero si dia bo fecha di keur vence, lo no prolonga mas cu stuur na man drechi.

CONSIDERACION

Ta tene consideracion cu e autonan aki ta diseña y asambla pa participa den trafico cu ta core na man robes di caminda y como tal e chauffeur ta stuur na man drechi, pues pa por ta na e banda corecto. Den mayoria paisnan civilisa, a cambia e leynan caba den trafico cu ta prohibi pa e autonan aki participa den nan trafico. Aruba a tarda pa actualisa e leynan, pero ta sinti cu tin suficiente motibo awo pa haci e cambio aki.

INCONVENIENCIA

Chauffeurnan berdad por cumpra e autonan aki mas barata, pero e inconveniencia nan tambe ta hopi, manera ta ora di pasa un "Drive Thru" of mester paga pa sali for di un parkeerplaats. Visibilidad riba caminda ta menos bon y riba dje e autonan aki hopi bes ta facil pa altera su motor pa e core mas duro.

RAAD VAN ADVIES

Gobierno ta spera cu den e siguiente simannan Raad van Advies lo duna su opinion riba e cambio cu Minister di Husticia a propone, pa asina por anuncia esaki oficialmente y asina e cambio ta drenta na vigor. Un fecha exacto no tin ainda, pero e lo ta den un pa dos luna di tempo mas o menos.

PARO DI IMPORTACION

Bisando esaki, ta conseha e agencianan cu ta trece e autonan aki pa no sigui importa mas. Tambe ta conseha automobilistanan pa no sigui cumpra e autonan aki pasobra bo lo perde bo inversion cu tempo. Parce cu den algun caso, tin forma nan economico pa pasa e stuurwiel di banda drechi pa banda robes, loke sigur por scapa e doño di auto di perde su inversion.

KEURINGSKAART

Ta bon pa enfatisa cu e cambio di decreto gubernamental ta aplicabel solamente pa autonan cu ta participa activamente den trafico pa cual mester un keuringskaart. Pues e cambio aki no ta aplicabel pa autonan cu ta core riba tereno priva of ta pa pusta na Palo Marga so.

OPINION

Gobierno a tene cuenta cu opinion di departamentonan manera Dienst Technische Inspectie, Ministerio Publico, Cuerpo Policial Aruba y Departamento di Asuntonan Huridico di Gobierno den tumamento di e decision aki. Cu e cambio, Gobierno ta convenci cu lo haci nos trafico mas sigur y cu menos auto riba caminda cu de facto nunca tabatin mag di a subi caya, debi cu nan no ta traha pa nos mercado y nos trafico di stuur na man drechi.