Abogado a sorprende corte cu lista largo di hende pa scucha den caso apelacion expropiacion Paul Croes

ORANJESTAD – Abogado pa ex minister Paul Croes, esta mr Desiree Croes a sorprende corte di apelacion diamars cu un peticion pa scucha casi 100 persona como testigo den e caso di apelacion expropiacion di e ex mandatario. E mandatario dos aña pasa December (2021) a keda sentencia pa corte di prome instancia pa paga e suma bek di AWG 183.489,10 mil florin of sinta un castigo di prizon (extra) di 1 aña. Paul Croes,  cu awe ta celebra su cumpleaños, mes no tabata den corte pasobra e lo ta sinti su curpa malo. Su casa Melony cu a keda exonera di e parti aki tambe, si tabata presente den sala di corte cu un tanta. E caso di apelacion mes ta poni pa tuma lugar na maart di 2024. 

PAKICO UN LISTA ASINA LARGO

Segun e abogado, ta necesario pa scucha por lo menos un cantidad grandi di e personanan aki (casi 100) cu segun e abogado, por confirma cu mayoria di e placa cu su cliente ta wordo acusa di a malversa, e la ricibi legalmente, cu prueba y e personanan aki por haci esaki. 

TARDANSA PA PRODUCI LISTA

Segun e abogado, e peticion a bin awor debi cu a dura tempo pa por a localisa tur e personanan aki y confirma cu nan por wordo scucha. Ademas, for di April unda cu corte a pidi si tin mas informacion necesario, te cu September ultimo, Croes a purba yega na un areglo di pago pa e suma supuestamente cu mester keda expropia, pero no a logra ya cu corte a rechasa esaki. Y ta pesey awor numa ta bin cu e lista aki. Ta trata di hendenan cu a duna Croes regalo den forma di placa durante su casamento na 2013, unda cu mayoria di e sumanan aki ta sumanan cuantioso. Algo segun e abogado, contrario na custumber Hulandes, ta usual ora di casamento cu ta duna placa como regalo den un envelope. Ademas, tin placa cu a ricibi di carnavalistanan unda cu e casa y famia tabata traha headpiece pa e participantenan di nan grupo, y a haci mencion di casi 300 participante, pagando por lo menos 250 florin pa headpiece. Tur ta placa cu a ricibi legalmente y e hendenan riba e lista, por prueba y testigua esaki. Cu tur esaki, e suma basico cu ta wordo menciona di e expropiacion, ta incorecto y esaki ta loke e abogado ta bay bringa y ta su base di defensa. Esey tin cu haci cu e suma cu mester expropia, lo bira hopi mas chikito cu corte kier pretende. 

MINISTERIO PUBLICO

Ministerio Publico no tabata nada contento cu e situacion cu cual abogado Croes a presenta awe mainta. De echo, a considera e situacion uno no corecto, considerando cu ta for di April a pidi pa duna informacion, y despues di awor 6 luna, ta bin presenta un lista cu casi 100 persona pa scucha. Esaki siendo cu tin un sentence dicta cu ta mustra hopi cla, cu e ex minister a wordo haya culpable pa e suma menciona y cu e mester paga esaki bek. Como tal, OM no tabata dispuesto pa bay di acuerdo cu e peticion di e abogado. Ora cu OM su fiscal a caba expresa su indignacion riba e loke a sosode, huez a puntre si e kier a duna un comentario riba esaki mas, e fiscal a nenga, indicando cu e la bisa tur loke e tin cu bisa y no tin nada mas pa añadi. Huez a cera e tratamento y lo dicidi riba. 27 di November proximo, si ta honra e peticion di e abogado.