VWI: No ta compronde pakico atrobe a pospone sentencia importante

ORANJESTAD – E sindicato di trahadonan Vereniging van Werknemers met een Individuele Arbeidsovereenkomst In Dienst van WEB NV (VWI) na WEB ta disgusta cu ainda no tin un sentencia den caso di apelacion riba un sentencia di caso sumario na maart di 2021. Asina e sindicato ta bisa diahuebs. Segun e sindicato, tabata diamars, dia 31 di october 2023, cu Corte Comun di Aruba, Corsow y St. Maarten pa di tantisimo biaha a pone riba e rol di Corte e anuncio cu lo duna uitspraak di e vonnis di e caso den Hoger Beroep cual VWI a entama mustrando asina VWI su desacuerdo pa cu e uitspraak di e Kort Geding (nr. AUA202100225) riba 10 di maart 2021 y dicta door di mr. J. M. J. Keltjens. 

UN BIAHA MAS

E sindicato a nota pues cu un biaha mas Corte Comun a dicidi di postpone e uitspraak di e caso den Hoger Beroep (nr. AUA202100053KG) te na proximo aviso. Nan ta recorda cu dia 30 di mei 2023 a sali den diferente medionan di comunicacion un declaracion di sr. mr. Mauritz de Kort, presidente di Corte Comun di Aruba, Corsow y St. Maarten, bisando, quote: “Ora cu e caso a wordo traspasa di Aruba pa bay pa e combinacion di apelacion, esta e tres hueznan na Corsow, e traspaso no a bay bon, pues nos a perde e caso for di bista.” Di fin di mei 2023 pa fin di october 2023 ta cinco luna; VWI ta puntra su mes si ainda e caso aki ta ‘perdi for di bista’?CARTA MANDA

Riba 5 di juni 2023 VWI a manda un carta pa sr. mr. de Kort puntrando kico precies a bay robes cu e traspaso di nos caso di Hoger Beroep y puntrando tambe kico ta e ‘stand van zaken’ awor cu a ‘haña bista bek’ riba VWI su caso den Hoger Beroep. Riba 5 di juli 2023 VWI a haña manera contesta di Corte Comun un carta masha cortico mes y bisando practicamente nada.

NO A SIRBI HUSTICIA

VWI ta keda para ariba cu husticia no a wordo sirbi cu e uitspraak cu mr. Keltjens a duna pa cu e Kort Geding cu VWI a entama contra WEB pa cu e inkorting ilicito di 12.6% di salario na aña 2021. Tur hende cu conocimento di Aruba su leynan kende VWI a consulta a bisa VWI practicamente e mes un cos: e uitspraak di mr. Keltjens di dia 10 di maart 2021 ta ‘kort door de bocht’ y no ta conforme ley.POSPONE SENTENCIA

Corte Comun a postpone e uitspraak di e vonnis di e Hoger Beroep entama pa VWI mas cu cinco biaha caba. Ya ta dos aña y shete luna cu VWI ta en espera di un uitspraak pa cu e Hoger Beroep aki. Ta kico ta pasando? Mr. J. M. J. Keltjens su uitspraak di dia 10 di maart 2021 ta corecto of no ta corecto? E uitspraak ta conforme ley of no ta conforme ley? VWI kier claridad riba esaki pa por delinea kico VWI su siguiente pasonan lo ta. Corte Comun no por sigui rek e uitspraak aki mescos cu un cakiña.

Segun e sindicato, e ta bisto cu e caso di Hoger Beroep aki no ta uno facil y cu sigur ta na su lugar pa e tres hueznan di Corte Comun tuma nan tempo pa trece un dictum husto y conforme ley. Pero dos aña y shete luna ta, den VWI su opinion, di berdad ‘a very very long stretch’.

OPTIMISTA

VWI ta keda optimista cu husticia lo prevalece y cu e uitspraak di e Hoger Beroep lo ta den VWI su fabor. Segun e sindicato, no por ta asina cu un compania estatal ta bin hinca man ad hoc den saco di su trahadonan (bou orden di gobierno) cu e pretexto di ta actua conforme di ‘algemeen belang’ pa cu e pandemia. Aruba tin leynan y articulo di leynan cu ta diseña specificamente pa atende cu situacionnan calamitoso cu ta di interes general (Staatsregeling van Aruba y tambe e Calamiteitsverordening). Pero segun VWI,  Gobierno di Aruba a dicidi di haci y deshaci manera cu nan ta haña ta bon sin tene cuenta cu ley y bou di e pretexto (pa no bisa e ‘mentira’) cu ta Hulanda ta impone e inkorting di 12.6% aki (zowel Knops y van Huffelen a desmenti publicamente cu Hulanda a ‘impone’ e inkorting di 12.6% aki).

VWI ta keda optimista, pero e tardamento largisimo y biramento rond aki di Corte Comun pa duna un uitspraak, no ta mustra bon y no ta contribui positivamente na fortalese e confiansa den nos sistema hudicial.