Kiwanis Club of Palm Beach “Over the Moon”Charity Golf event

ORANJESTAD – Diabierna ultimo, Kiwanis Club of Palm Beach tawata anfitrión di su di 2 edicion di “Over the Moon” charity golf na Tierra del Sol. Contribuyentenan a hunga golf y participa den otro actividadnan bou di luna yen cu e meta pa recauda fondo pa sigui sostene proyectonan di Kiwanis Palm Beach, pero en especial e proyectonan emblematico: “StimaMi GuiaMi” y “Child Car Seat”.

Kiwanis ta para pa muchanan y manera tur actividad di FUNdraising di Kiwanis club of Palm Beach, tur fondo recauda ta bai 100% bek den comunidad, pero en especial nos muchanan cu mester di dje. E biaha aki, e fondonan recauda lo bai pa sostene “StimaMi GuiaMi”, cu ta un programa den cual e meta principal ta pa reenforsa e relacion entre mayornan y nan yiu(nan). Alabes den e programa mayornan ta haya conseho riba tereno di salud den e prome fasenan di desaroyo di e mucha. E otro parti di e fondonan, lo wordo inverti den e proyecto di “Child Car Seat”, cual proyecto tin e meta pa conscientisa mayornan ariba uzo di “Child Car Seat” pa proteha nos muchanan den trafico.

 OVER THE MOON NIGHT GOLF

 E teamnan a subi e cancha di golf, pa e asina yama “Tee-Off”, cual tawata planea pa 7:30pm en punto, y asina duna inicio na e competencia. Teamnan di 4 hungador, den formato di e asina yama “4-man scramble”, a haya nan balanan estilo “glow in the dark” y nan scorecard pa asina na final por a saca e team ganador.

CHIPPING, PUTTING, CLOSEST TO THE HOLE

Despues di e competencia riba e cancha di golf di Tierra den Sol, e contribuyentenan a topa otro den patio di e restaurant di Tierra del Sol, pa disfruta di un dushi cuminda y algo di bebe. Aki ta caminda a cuminsa di biaha cu e competencia di “chipping”, “putting” y “closest to the pin”. Mester menciona cu e parti competitivo aki ta hala hopi atencion bou di e golfistanan, cu e tension y presion necesario.