Autoridad di Aruba tin atencion pa turistanan venezolano 'desampara'

ORANJESTAD – Aunke cu logisticamente y financieramente no ta haci nada pa e grupo di venezolano ‘pega’ na Aruba, autoridad competente di Aruba tin atencion pa e problema. Asina minister di turismo Otmar Oduber y CEO di Aruba Tourism Authority, Ronella Tjin-Asjoe a sigura NoticiaCla.com. Un grupo di mas of menos 50 turista (for di un grupo inicialmente mas grandi) no tin modo di move financieramente na Aruba, debi na un problema cu nan tin cu nan banco na nan pais. Nan a acudi na nan consulado (venezolano) y despues na parlamento di Aruba, pero ambos a mustra nan cu mucho no por wordo haci pa nan. Oduber y Tjin Asjoe a mustra cu nan ta monitoria e situacion, pero cu ta consulado di e pais concerni, tin cu remedia e situacion.

PROBLEMA CU BANCO

E grupo completo mes ta mas di 100 venezolano cu a bin Aruba pa pasa nan vacacion, y a bin haya nan mes pega pasobra nan credit card bancario no ta activa. Mientrastanto, segun Oduber, algun di nan pa medio di famia y amigonan a logra haya cierto ayudo, y e banco mes a logra saca poco placa pa otro. Tabatin un grupo di 50 ainda cu tabata ‘desampara’. “E grupo (total) ta atende cu un banco priva (na Venezuela), mientras cu mayoria di banconan ta di gobierno di Venezuela. Segun splicacion di Oduber, e banco priva lo tin un diferencia di opinion pa condicionnan cu nan no a cumpli cune (cu gobierno di e pais), pa cual a imposibilita e hendenan cu a biaha, pa nan extrae y haya nan placa via nan credit card”, Oduber a splica.

CONSULADO RESPONSABEL

Na su turno, Oduber a tuma contacto cu e consulado pa mira si a sosode caba y cu lo bin ripiti. Den e caso a wordo mustra na e grupo, cu e sitio caminda cu nan tin cu atende, ta embahada (consulado) venezolano pasobra e ta e responsabilidad di e pais en cuestion. Consulado lo a priminti cu nan lo purba haci loke nan por pa resolve e problema.

PROBLEMA CONTINUO?

No ta conoci pa Oduber, si ta trata di un solo avion di turista cu tin e problema actual of si tin mas turista cu ta na caminda pa Aruba y cu lo por contrae e problema aki. Direccion di relacionnan exterior di Aruba tabata en contacto cu consulado pa haya un indicacion si e problema pues ta bay continua of si a soluciona e problema cu e banco aki.

ATA NO POR HACI NADA

Tjin-Asjoe den calidad di CEO di ATA a bisa cu e la ricibi e grupo aki y a dirigi su mes na consul di Venezuela y e grupo aki tambe. “Mi a splica nan cu basicamente ATA of Aruba no por haci mucho mas cu trece na atencion di consul y trata pa influencia pa decision y solucion por wordo brinda pa nan pa e situacion cu nan ta pasando aden” Tjin Asjoe a bisa. “No ta nos deseo pa tipo di situacionnan asina escala na algo cu ta bira mas precupacion humanitario, unda cu hende no tin lugar di come of drumi. Pa aworaki e responsabilidad no ta den man di ATA, sigur considerando e naturalesa di e caso actual”. Mas concreto, Tjin Asjoe a bisa cu esey ta nifica cu ATA no ta pagando hotel ni otro ayudo financiero” e CEO a finalisa bisando. Solamente ta monitoriando e situacion.