Alto comisario ta reacciona riba video circulando cu polis aden

ORANJESTAD - "Un Cuerpo di Polis ta cay y lanta pa su integridad” Esaki ta e prome reaccion di alto comisario di polis Dolfi Richardson riba e video cu ta circulando, envolviendo algun agente policial. “E (integridad) ta lo mas importante den un organisacion hudicial manera nos. Pesey mi ta bisa semper, integridad di nos Cuerpo policial no tin un prijs", Richardson, a duna di conoce. E opinion aki pues ta basa riba e discusion cu tin e ultimo dianan aki pa cu comportacion di algun polis pafo di ora di trabou.

WOWO RIBA POLIS

Segun Richardson, ultimo añanan ta corda tur polis cu e expectativa di comunidad ta subiendo mas y cu tecnologia moderno y acceso amplio di publico na red social ta haci cu e "wowo riba Polis" ta mas skerpi. Y esaki ta splica tambe e atencion cu e video cu ta circulando, a haya mirando cu den dje tin varios polis ta aparece.

NORMA Y BALOR

"Esey ta bon tambe, pasobra tur esunnan cu scoge pa sirbi nan pais mester ta consciente di e presion ey, di kico Bo ta haci of laga di haci, unda bo ta bay of laga di bay y asina por sigui menciona. E ta un decision cu cada Polis ta tuma pa nan mes, segun nan mesun nivel di norma y balor", asina mr. Dolfi Richardson a enfatisa BON NOMBER

Richardson ta sigui mustra cu hopi hende no tin un idea di e bon nomber cu Cuerpo Policial Aruba tin awendia den exterior, specialmente na Merca, na Hulanda y den Caribe. E ta mustra cu hopi otro cuerpo di polis ta bin aki pa train cu nos, riba varios tereno unda nos ta specialisa den dje. No solamente pa nos conocemento y experencia pero tambe pa nos integridad, Polisnan cu bo por confia riba nan! E bon nomber aki no ta algo cu bo por cumpra na un supermercado, sino ta bin cu añanan di confiansa, di demostra cu bo ta capaz cu bo ta cumpli cu bo palabranan....ser integro kiermen ta honesto cu principionan moral halto.

INTEGRO

Den e cuadro aki Mando Policial ta duna masha balor na e palabra "integro" dor di hisa e nivel di norma den e Cuerpo di Polis y exigi di tur cu ta forma parti di e organisacion pa ta ehempel den comunidad, tanto ora nan ta den uniform bisti como tambe ora nan ta liber.

TENDENCIA INTERNACIONAL

E no ta un tendencia solamente na Aruba, si mira noticia rond mundo anto por nota cuanto publicidad ta duna ora polisnan no actua corecto y con e sistema mes ta coregi su mes mesora, dor di castigonan y medidanan disciplinario of den veredictonan di Corte. Na Aruba ultimo añanan cada bes un Polis tuma e caminda robes, Corte ta conden'e y riba dje ta exigi pa e no funciona mas den e Cuerpo. Esey ta un forma pa sigura cu ta solamente e bon Polisnan ta keda atras den e organisacion.

MIHO CUERPO DI REGION

Segun Richardson, e ta sigura “ cu nos tin un bon Cuerpo di Polis y mi ta durf di bisa, un di e miho nan den henter nos region. Nos ta soluciona mas caso compara cu otronan, nos ta ofrece mas servicio cu otronan, nos ta miho capacita, nos tin mas experto den cas y asina mi por sigui menciona. Riba dje, nos tin sistemanan di control interno pa sigura nos mes cu tur cu ta traha como Polis ta hendenan integro y cu ta tene nan mes na normanan halto di disciplina y comportacion", Richardson ta finalisa bisando.

E CASO MES DI E VIDEO

For di algun dia caba, tin un video circulando riba internet cu lo ta envolvi un of mas agente policial. E video ta graba riba un yate, y ta envolve bailamento basta vulgar. Mes momento tin indicacion cu un di e agentenan tabata envolvi den un caso di violacion algun tempo atras.

INVESTIGACION

Relaciona cu algun rumor circulando riba conducta inapropia di parti di algun agente policial, Cuerpo Policial ta conduciendo un investigacion interno riba e colega nan cu supuestamente ta envolvi den esaki, segun vocero di polis Lito Lacle a bisa NoticiaCla.com. Pendiente e investigacion ya a tuma algun medida disciplinario contra esnan envolvi pa asegura e integridad di e investigacion.