Aruba Bank a gana caso den apelacion contra Bochincha y Otmar Oduber

ORANJESTAD – Corte di Apelacion diamars a cambia e sentencia inicial den caso di Aruba Bank contra e compania Bochincha y e cliente Otmar Oduber, den sentido cu ta duna Aruba Bank razon, revocando e sentencia anterior di februari 2021 ora cu e banco a wordo obliga pa habri un cuenta comercial pa BCY y ODuber. Esey ta nifica cu Aruba Bank no ta obliga pa tin cuenta bancario pa e compania di Oduber, esta Bochincha Containeryard mas.  

CASO ANTERIOR

Den e caso anterior na februari 2021 cu e tempo ey Oduber y BCY a cuminsa contra e banco, corte di prome instancia a duna Oduber y BCY razon y a obliga Aruba Bank pa habri cuenta comercial pa Oduber y su negoshi BCY. Aruba Bank a cumpli cu e sentencia, pero dos dia despues a apela e sentencia. Un luna despues, Aruba Bank a pidi pa pendiente e caso di apelacion, pa suspende e sentencia anterior, locual corte a rechasa. E aña aki na September e caso di apelacion a tuma lugar y awe tres huez a dicta cu Aruba Bank ta haya razon y ta revoca e sentencia di e caso anterior. 

MOTIVACION DI CORTE

Corte di apelacion a splica den su sentencia di 12 pagina, cu ta considera cu mirando tur loke ta pasando rond di e cliente Oduber cu su caso penal Flamingo, y algun asunto comercial cu a tuma lugar dentro di e negoshi BCY, cu esaki ta trece den duda e tipo di negoshi cu e compania ta maneha y cu ta haci dificil pa e banco e.o. por tin un control debido di e fluho di placa, treciendo tambe na peliger su relacion cu banconan internacional como coresponsal, cu ta pone cu e interes ta pisa mas hopi pa e banco cu pa e compania comercial y e cliente Oduber. Por lesa e sentencia completo AKI.