Elmar: Algun bario sin coriente door di fayo den red

ORANJESTAD -  Tabata diabierna pa mas o menos 8’or di anochi cu e prome yamadanan a cuminsa drenta na Storingsdienst di N.V. ELMAR indicando cu coriente a bay. A activa dos ekipo di tecniconan specialisa pa e tipo di fayonan asina, cu despues di algun ora a logra reconecta tur cliente atrobe riba e red di coriente. E areanan afecta dor di e fayo aki tabata Holiday Inn Resort, Playa Linda Beach Resort, Hyatt Regency Aruba, South Beach Mall, McDonald's Palm Beach, Saliña Cerca, Bakval, Rooi Santo, Westpunt, Marriott Vacation Club y Tierra del Sol Resort & Golf. Despues di un investigacion di e 2 ekiponan di N.V. ELMAR, a descubri cu tabatin dos diferente fayo riba e red di 12KV na altura di Palm Beach. Pa mas o menos 10:00pm a cuminsa distribui coriente bek poco poco pa e areanan afecta y pa 1:10am a logra pa tur hende tabatin coriente atrobe. Despues cu a logra pa tur cas ta reconecta riba e red, N.V. ELMAR a start cu un investigacion pa sigura cu e fayo no lo presenta mas y pa evita cu ta perde coriente den barionan. Anualmente N.V. ELMAR ta inverti miyones den nan infrastructura, sea pa reemplasa parti di nan red como tambe den drecha y renoba esunnan existente. Di e forma aki ta garantisa miho calidad di distribucion di coriente riba nan red. N.V. ELMAR ta pidi disculpa na su clientenan, pa e oranan cu a keda sin coriente debi na e fayo inespera aki.