Seleccion damas Aruba a haci un comeback, ganando di Bonaire 5-0

ORANJESTAD – E seleccion di damas di futbol di Aruba a dal duro dialuna merdia ganando di Bonaire cu e score di 5-0 na Aruba despues di a perde siman pasa na Bonaire. Como tal e comeback aki a dal mas dushi pa nos damanan local. “Nos a hunga cu curashi, pasion, y a bringa cada minuut pa logra e victoria extraordinario aki. Laga e victoria aki keda un simbolo di nos dedicashon y e haltura cu nos por logra ora nos ta uni “ ta loke e ekipo a laga sa riba rednan social. “ Pa nos oponentenan, nos ta expresa nos gratitud pa un wega competitivo. E spirito y esfuerso riba tereno merece nos respet. Futbol ta un wega di determinashon y camaraderia, y nos ta agradecido pa e experiencia comparti”, tabata e ultimo comentario.