Pasaheronan di avion problematico di KLM ta bolbe Hulanda diadomingo

ORANJESTAD –E pasaheronan riba buelo di KLM cu a bati alarma diasabra merdia, ta sigui pa Hulanda diadomingo awor. Asina fuentenan fidedigno serca di e proceso, a splica NoticiaCla.com diasabra atardi laat. Manera ta conoci, diasabra alrededor di 4:20pm a activa Cuerpo di Bombero pa un avion Airbus 330 di e aerolinea KLM cu tabata yegando Aruba for di Hulanda cu problema cu un di su motornan. Aeropuerto a informa Central di Alarma di Cuerpo di Bombero cu e avion tabatin 206 pasahero abordo y cu tabatin un "leak" di combustibel den motor number 1. E avion a aterisa algun minuut despues, sin problema.

ALARMA ACTIVA

Manera semper ora di un alarma na aeropuerto, Cuerpo di Bombero ta activa su sistema mesora y ta manda yama bomberonan for di cas y for di e otro kazernenan pa reforsa e ekipo na aeropuerto. Tambe a conta cu 3 ambulance na e kazerne, den posicion "stand by". 

CONTROL

Asina cu e avion a aterisa, Bomberonan a compañ'e riba pista y eynan a nota cu e motor number 1 di berdad tabata "leak" azeta, riba henter e trayectorio riba rampa. A staciona e avion na posicion number un riba plataforma di aeropuerto, mientras Bomberonan a spuit foam riba e combustibel cu a basha riba pista. Esey pa evita cualkier chispa cu por causa un candela. Tambe Bomberonan a inspecciona y controla e avion pa siguridad di e pasaheronan. Asina cu a "shudown" tur sistema, a declara e situacion "safe" y consecuentemente a cancela e alarma.

PROCEDURA

Manera ta custumber na momento di un alarma grandi asina, Polis ta percura pa cera tur caminda cu ta conduci na aeropuerto. Na e sitio a crea un "Comando Post" pa tuma tur decision, cu presencia di Alto Comisario di Polis, Comandante di Cuerpo di Bombero y Oficial na turno di Servicio di Ambulance.

HACI PISTA LIMPI

Ora cu tur pasahero a baha for di e avion, Cuerpo di Bombero a duna Aeropuerto un man pa haci e pista di aterisahe limpi, pa por a continua cu operacion regular na nos aeropuerto. Mester tene cuenta cu diasabra ta un di e dianan mas ocupa den industria di aviacion pa nos isla.