Aruba trahando contra holoshi pa logra aprobacion di Hulanda di LAFt adapta

DEN HAAG – Gobierno di Aruba ta trahando contra holoshi pa ainda keda cla na tempo pa logra aproba un LAFt adapta, prome cu fin di e aña aki ainda, manera cu Hulanda a condiciona Aruba. Manera noticiacla a raporta diabierna caba, Aruba a conta cu RMR lo a aproba e proposicion di Aruba diabierna ultimo, pero e la dal den bashi, ora cu RMR a opta pa warda awor cu tin tres cambio adicional cu e kier mira den e ley. Hulanda no ta confia e LAFt mucho y pesey ta haciendo tur posibel pa sigura cu nan ta ‘gana’ e bataya aki. Si diabierna e tres condicionan tabata desconoci ainda publicamente, gobierno di Aruba den fin di siman a dicidi di habri buki y comparti kico e tres condicionan nobo ta, cu segun e prome mandatario, Aruba ‘por biba cu ne’.

E TRES CONDICIONAN NOBO 

E prome condicion ta trata e maneho financiero: Financieel Beheer; Hulanda kier pa e Minister di Finansa mester duna extra informacion di e maneho financiero;

E di dos condicion: Hulanda kier pa e palabracionnan cu Aruba mester haci cu CAft riba e tema di gastonan di personal prome cu e ley drenta na vigor;

E di tres condicion: tin di haber cu e PPP proyecten. Si Aruba cumpli y hinca e tres puntonan aki den e ley, Hulanda por aproba esaki pa despues laga Parlamento aproba esaki. 

TEMPO

Manera ta conoci, Aruba a spera cu e lo a keda cla cu e asunto aki diabierna ultimo, mirando cu tempo ta importante y no necesariamente na nan banda. Pesey a spera cu diabierna ultimo por tabatin un aprobacion den RMR, pa e trayecto sigui cana conforme e periodo di 6 siman cu mester pa e pasa tur punto prome cu e keda aproba formalmente, y ainda keda cla prome cu fin di e aña aki. Esey no a sosode. Pero, Hulanda a hinca 'awa den biña' door di apodera e minister y secretario di BZK diabierna pa por dicidi pa RMR, evitando cu mester warda te e siguiente RMR fin di otro luna, cu sigur lo no tabata suficiente tempo pa e ley keda cla. Awor ta trahando contra tempo, pa asina e dos mandatarionan Hulandes por aproba e cambionan den e proximo siman of dos. 

PENSAMENTO DI GOBIERNO

Prome Minister a duna di conoce cu esaki ta e condicionnan cu Gobierno di Aruba y Secretario di Estado Alexandra van Huffelen lo traha riba dje y concretisa den e siguiente dianan pa asina keda cla cu e cambio di e ley di LAft.