RMR no a vota riba proposicion di Aruba pa cambio di LAFt

DEN HAAG – Contrario na pensamento di gobierno di Aruba (lesa: Prome minister Wever Croes:red), Conseho di Minister di Reino (RMR) no a vota riba e proposicion di Aruba di e cambio di ley di LAFt (supervision financiero). E cambio di ley tabata riba agenda riba peticion di Aruba, pasobra tabata necesario pa esaki keda trata mirando cu e version actual ta vence fin di e aña aki. E biahe ‘sorpresa’ di e prome minister Wever, tabata netamente pa personalmente presenta su caso na RMR personalmente y asina gana tempo pa cu e LAft nobo y pa RMR aproba e ley awe. Pero Aruba a dal den bashi ora cu esaki no a yega na votamento. E motibo ta cu Hulanda a añadi tres punto e siman aki cu e kier den e ley, prome cu esaki por keda aproba. Segun e prome mandatario, diamars ultimo Aruba a keda sorprende cu e cambionan aki, pero cu ta cambionan cu Aruba por biba cu ne. Tabata remarkable si cu tur esaki ta sosode mientras cu e secretario di estado van Huffelen mes ta na Bonaire. 

ENCUENTRO CU VAN HUFFELEN

E prome mandatario a anuncia diahuebs di sorpresa cu aki cu e la topa cu secretario di estado van Huffelen na Aruba diaranson ultimo mientras cu Van Huffelen tabata na Aruba di transito pa Bonaire, pero no a informa kico tabata e contenido. Noticiacla a compronde di Hulanda si, cu e tabata un reunion solicita riba peticion di Aruba. Awe, Wever Croes a confirma esey tambe, informando cu durante e reunion cu Van Huffelen, e kier a toca e tres puntonan extra cu Hulanda kier den e ley, cu van Huffelen. No ta conoci si ta despues di e reunion ey, cu e prome mandatario a dicidi di subi avion rumbo pa Hulanda pa wak si e por logra keda cla cu e asunto aki. 

WARDA 

Segun e version di prome minister Wever, e la haci e biahe pa logra cu RMR por a keda convenci di e presentacion di Aruba y aproba e cambionan di ley, pa asina Aruba ta den cumplimento y cu e supervision por continua tambe despues di 2023 cu un ley vigente. Y mirando cu tempo ta cabando cu Aruba, Wever no kier a warda te e proximo RMR cu ta fin di November, pasobra esaki lo no a duna Parlamento di Aruba tempo suficiente pa trata e cambio di ley aki, y keda cla prome cu fin di aña. 

MANDATO

Mientras cu RMR no a vota riba e cambionan, a duna van Huffelen e mandato pa negosha na nomber di RMR, evitando cu mester warda te e proximo RMR na November prome cu por vota pa e ley aki di LAFt. Cu e mandato aki, e aprobacion por sosode mucho mas liher den practica. Claro, si van Huffelen acepta e cambionan y cu Parlamento di Aruba tambe acepta nan.