A nenga pasahero cu risico di Ebola drenta Aruba

ORANJESTAD -  "Nos a cumpli cu tur locual ta stipula den e protocolnan cu nos ta manehando, pa loke na Ebola", asina Minister di Salud Publico Dr. Alex Schwengle, a cuminsa splica. E ta referi na e prome caso sospechoso di Ebola cu a yega nos isla awe diabierna y cu a debolbe ambos pasahero bek pa Merca. "Di berdad cu nos ta bon prepara pero nos a scoge pa no tuma ningun riesgo". Diabierna pa 11.15am a notifica Departamento di Salud Publico cu lo tin un pasahero yegando Aruba for di Merca, considera como un "low risk case" pa Ebola. Mester bisa cu e persona mes no tin ningun sintoma. Pero mirando cu e ta den e periodo di 21 dia di incubacion y cu e chens tey cu e lo por presenta sintoma, pais Aruba a opta pa no tuma ningun chens y Minister hunto cu Departamento di Salud Publico a tuma e desicion di no permiti pa e turista aki drenta Aruba. Mester menciona cu ta trata aki di un pareha casa, di cual ambos tabata 13 dia pasa na Siera Leone y como tal no a pasa 21 dia ainda. Una bes cu e avion a baha awe 3:00pm na Aeropuerto, a baha e pashentnan y hiba nan pa un camber isola. Ey hunto cu e ekipo medico di Aeropuerto a check nan temperatura di curpa cu ta mustra bon. Pero den deliberacion cu Inmigracion y Aduana Mericano, IASA y Inmigracion di Aruba y Consulado Generaldi Merca staciona na Corsou, a opta pa miho manda e pareha riba e mesun vuelo bek pa Merca. E decision ta fastioso pasobra e pareha a planea di pasa algun dia di vakantie riba nos isla. A splica nan cu si algo pasa y sintomanan presenta, cu nos lo no tin e recursonan manera lo tin na Merca. Mester menciona cu Departamento di Salud Publico di Aruba tabata den contacto estrecho cu e organisacion cu ta atende e asunto aki na Hulanda y cu ta haci'e pa henter Reino Hulandes. Esaki no ta e prome caso cu nos isla a topa cune di pasaheronan considera den "low risk" pasobra algun tempo pasa caba tabatin un pasahero cu e mesun situacion pero a neng'e di subi avion for di na Merca caba. Esaki ta e prome caso di un pasahero cu ta yega te aki, pero ta opta pa miho mand'e bek pa su propio bienestar y sigur tambe pa esun di nos isla. Ambos pasahero no tabatin contacto cu ningun hende durante cu nan a permanece na Aeropuerto. E forma di anda aki ta cuadra totalmente den cuadro di e protocolnan relaciona cu casonan sospechoso di Ebola.