Croes: Lo evalua aumento di salario minimo

ORANJESTAD - Gobierno ta evaluando pa aumenta salario minimo na Aruba. Durante tratamento di presupuesto 2015, minister Paul Croes riba pregunta di p;arlamento a bisa cu lo inicia e proceso pa aumenta e sueldo minimo entrante Januari 2016. "Pa aumenta e sueldo minimo, tin algun rekisito cu mester cumpli cune. Na e momentonan aki nos ta papiando di Awg. 1636 florin y siguramente nos ta sinti cu tin espacio pa e aumento aki. Legalmente mester sondea e inflacion entre augustus 2014 y augustus 2015 (aumento den e prijs di consumidor). Cu e aumento di e BAZV cu 1% esaki lo por tin efecto riba e inflacion. Tambe nos por a tuma nota di algun desaroyo riba e mercado di crudo y fuel cu eventualmente lo afecta e percentage di inflacion", Croes a mustra. Un desicion asina mester ta tuma cu tur cautela pa motibo di efectonan inflatorio cu un aumento di sueldo minimo por trece cune. Minister Croes lo aserca Conseho Social Economico pa nan conseho riba e posibel aumento di sueldo Minimo. Cifranan di Censo ta mustra cu entre 15 y 20% di e trahadornan na Aruba ta gana e sueldo minimo. "Tumando tur cos den consideracion y hopi importante na bienestar di e trahadornan di nos pais, nos lo bin cu un propocion rasonabel pa un aumento di e sueldo minimo", l Croes a finalisa bisando.