Wardacosta na Corsou a intercepta boto piscado cu 223 paki di cocaina

WILLEMSTAD - Ayera den oranan di atardi Wardakosta a interseptá pa medio di nan radar un moveshon sospechoso na sùit di Kòrsou. Wardakosta a manda su boto mesora den e direkshon ei pa kontrolá kaminda a topa ku e boto di piskadó Ryano ku 4 persona lokal na bordo.

Segun nos informashonnan e situashon tabata sospechoso i p’esei a disidí di bin ku e boto kosta na Parera pa einan hasi e investigashonnan. A bai ku duana i kachó na bordo i a bin dal den kantidat di paki di droga. No ménos ku  223 paki ku tabata kontené supstansia ilegal paresido na kokaina. Despues di a pisa e droga a resultá ku ta trata di 260 kilo di kokaina.

A detené tur kuater lokal ku tabatin na bordo di e boto i a pasa esaki over pa Kuerpo Polisial di Kòrsou pa sigui ku e investigashonnan.

Polis di su parti ta informá di e detenshon i e kuater hendenan lokal ta trata di ta E.J.A.M. di 27 aña di edat nasé na St. Maarten; R.F.L.E. di 28 aña di edat nasé na Kòrsou; G.A.B. di 33 aña di edat nasé na Kòrsou; R.R.S. di 44 aña di edat nasé na Kòrsou.  Tur a pasa pa e personal di divishon di krímen organisá i riba òrdu di fiskal nan a keda enkarselá miéntras investigashon ta kontinuá. NOTA: Texto ta scirbi den Papiamento fonetico di Corsou.