Nina den Heyer ta bolbe como diputado na Bonaire

KRALENDIJK – Ex politico y diputado Nina den Heyer ta bolbe como diputado na Bonaire proximamente. Noticiacla a compronde di fuentenan cerca di e proceso, cu den Heyer lo bira un di e tres diputadonan cu lo forma e proximo colegio ehecutivo na Bonaire, despues cu siman pasa gobierno a cay ora cu un miembro di e colegio a retira su sosten na e partido di coalicion MPB. Esaki a pone cu e sosten no tabatey cu consecuencia cu e gobierno a cay. 

Algun dia despues, partidonan di oposicion Democraat, hunto cu M21 y e persona cu a retira su confiansa den MPB, Cyril Vrolijk a forma un aliansa y firma un acuerdo di gobernacion. Alabez tabata conoci cu mester a busca candidatonan pa yena e funcion di e diputadonan cu a bira disponible. Noticiacla a compronde cu sigur den caso di den Heyer, esaki lo ta a base di un forma professional, y no politico. Osea un vak gedeputeerde, envez di uno politicamente nombra. 

VAKGEDEPUTEERDE

Tambe tin informacion cu den Heyer a acepta e reto aki y cu esaki e ta bolbe bek como diputado, aunke e biaha aki den un forma di vak gedeputeerde. Den pasado e tabata diputado caba pa Comunidad y Cuido pa entidad publico Bonaire, pero representando e partido MPB politicamente. E la retira di esaki aña pasa y a cuminsa traha como hefe na Ministerio di OCW di Hulanda Caribense. OCW ta e abreviacion di Onderwijs Cultuur i Wetenschap osea Enseñansa, Cultura y Ciencia). Noticiacla a compronde cu e biaha aki e lo haya e mesun ‘carteranan atrobe, esta social y enseñansa. E intencion ta pa anuncia esaki diamars durante e proximo reunion publico cu tin na Bonaire.