Control severo pa combati e fenomeno di taxinan ilegal

ORANJESTAD – E fenomeno di taxi ilegal tin atencion di autoridad competente. Como tal e departamentonan manera departamento di transporte publico (DTP) hunto cu polis y personal di seguridad di aeropuerto tin algun siman caba trahando hunto pa combati e fenomeno di taxinan ilegal. Den cuadro di esey, desde aproximadamente 2 siman DTP, cuerpo policial y AAA (aeropuerto) ta realizando controlnan extenso y a stop varios taxi ilegal.

DOÑO DI APARTAMENTO

Varios biaha ta haya cu esnan cu ta busca turista na aeropuerto pa hibanan nan destinacion, ta doño di apartamentonan y ta inclui transporte den e prijs cu nan ta paga, sin cu nan tin e vergunningnan necesario pa haci e tipo di viahenan aki, peor ainda, abusando di e prijs unda cu turistanan tin biaha ta paga mas cu tarifanan di taxi legal.

CONTROL

Durante control na aeropuerto ta wak e hendenan cu ta yega busca turista na un forma continuo y e personal en cuestion ta evita cu e turistanan ta subi e auto mientras cu ta controla e papelnan di e chofer, varios biaha conhuntamente cu polis. E situacion a bira asina erg cu ora e personan aki ripara cu tin control, ta manda e turistanan riba caminda grandi, pero toch asina nan ta wordo gara.

GARA AUTONAN

Por a compronde cu cada biaha cu a realiza e tipo di controlnan aki a gara aproximadamente 6 auto cu tabata funciona ilegalmente como transporte publico. E controlnan aki ta hopi importante, no solamente pa proteccion di esnan cu ta realiza e ofishi aki legalmente, pero tambe pa e usuarionan di e tipo di transporte ilegal aki. Nan no ta conta cu e permisonan necesario pa realiza esakinan y ademas no tin e seguronan necesario pa core cu pasaheronan den auto.