ABC a bay corte contra gobierno y Embassy Suites pa revoca e permiso di construccion

ORANJESTAD – Aruba Bird Life Conservation (ABC) a hiba e compania Embassy Suites (Natura Development) y minister di Infrastructura corte diaranson, den un intento pa acelera e proceso pa rechasa e permiso di construccion, cu segun ABC nunca mester a wordo duna. Argumento di ABC ta cu e minister encarga (infrastructura) no tabatin autoridad pa duna e permiso en cuestion, pasobra e ta enpugna cu e asina yama LRO (Lv Ruimtelijke Ontwikkeling) y e ROPV. E proceso ta conociendo un tardansa y como tal e abogado di ABC a purba trece un cambio den esaki. 

E CASO

Noticiacla.com a compronde di e documentonan di abogado di ABC cu tin un tardansa pasobra ta wardando riba un contesta di e comision di obhecion di LAR. Ni ABC ni DIP a tende algo di esaki y mientrastanto e termino pa e minister en cuestion tuma un decision a vence 10 di oktober ultimo. Pero segun e abogado, for di e carta di e minister en cuestion, por deduci cu e minister no tin intencion di revoca e permiso di construccion, debi cu Natura lo ta empugna cu e condicionan, algo cu ta diferente cu e revocacion di e permiso di construccion debi cu e ta viola ley (LRO, ROPV). “Tanten cu e minister no dicidi pa destrui e permiso di construccion, revoca of rechasa esaki debi cu e ta contra ley, y awor cu e no ta desea di revoca e permiso, e permiso ta keda na bida” e abogado ta sigui bisa. ABC a bisa cu e tin un interes pa un decision independiente wordo tuma riba e permiso di construccion y cu te e momento ey, no tin e posibilidad pa Natura haci daño irreparable na e area en cuestion. E abogado ta argumenta cu si e minister responsabel pa medio ambiente dicidi pa duna un asina yama ontheffing, condiciona of no, y e permiso di construccion no wordo revoca, Natura mesora lo bay pa ehecucion (di e proyecto riba e beach:red) y cuminsa un eventual caso di daño y perhuicio. E abogado ta sigui argumenta cu e decision di un huez den un caso di profundidad (bodemrechter), si mester a otorga un permiso di construccion of no, mester wordo warda. Ademas ta mustra cu e daño na naturalesa lo ta irreparable si e permiso di construccion no wordo revoca. E caso su tratamento lo continua dia 1 di November proximo. 

Noticiacla ta mustra tambe cu e no tabata den corte y no a presencia e argumentonan di e contra partido y como tal no por trece e parti ey, Den e raportahe aki, ta e unico intencion pa demonstra e motivacion di e banda di e partido cu a inicia e caso aki, esta ABC, sin bay den detayes di nan banda di e caso. Loke ta resalta den e caso aki, ta e urgencia cu ABC tin pa suspencion di e permiso di construccion.