Awe Ministerio Publico a pidi Merca pa documentonan di confesion di Joran vd Sloot

ORANJESTAD – Ministerio Publico di Aruba awe, despues di a tuma nota via media di e confesion di Joran van der Sloot di e asesinato di Natalee Holloway un dia prome, a haci un peticion pa departamento di husticia Mericano pa documentacion riba esaki. Asina vocero di Ministerio Publico Ann Angela a splica Noticiacla.com diahuebs. “ Officialmente nos no a wordo informa ainda pa autoridadnan Mericano. Awe a sali un rechtshulpverzoek na US Department of Justice pa haya tur documento di nan investigacion” e la sigui bisa. 

KICO TA PASA DESPUES

Segun Angela, ta unabez cu OM ricibi e documentacion di Merca, cu por dicidi tocante e eventual siguiente pasonan. “ Nos a scucha di e declaracionnan di Joran via media, no formalmente di e autoridadnan Mericano. Pa OM por tuma nota, mester haya e documentonan oficial di un investigacion” e la sigui bisa. 

E CASO A ‘VERJAAR’ OF NO?

Tabatin e pregunta tambe, tanto na Merca como na Aruba, si e caso mirando cu ta algo di 18 aña pasa, a pasa su tempo (verjaar) cu ta pone cu no por persigui Joran vd Sloot mas pa e asesinato. Segun Ministerio Publico, e pregunta aki no por wordo contesta cu un si of no. “E ta depende di factornan den e investigacion. Pero mirando cu e ta un investigacion habri, OM ta sumamente cuidadoso cu duna informacion” Angela a sigui bisa. Loke e la bisa tambe si, ta cu oficialmente, e caso di desaparicion di Natalee Holloway ta un caso habri. Noticiacla mientrastanto a compronde cu mientras cu OM por dicidi di persigui e caso, ta keda na un huez finalmente pa dicidi si e ta admisibel of no, si e caso a ‘verjaar’ of no.