Croes (ATA): Confesion di vd Sloot di asesinato di Holloway ainda no 'afecta' Aruba

ORANJESTAD – “Te cu aworaki no tin preocupacion a base di locual nos a monitorea” tabata reaccion di CEO di oficina di turismo di Aruba Ronella Croes, riba e confesion di Joran vd Sloot diaranson, cu e la asesina e turista Mericano Natalee Holloway na Aruba na 2005. E confesion a bin dilanti durante e caso den corte federal Mericano unda cu un huez a confirma e admission y acepta esaki.  “ A.T.A. ta monitorea for di siman pasa, y ta on top di tur cobertura y mencion di Aruba relata na e caso aki” Croes a sigui bisa. “A.T.A. ta den contacto cu sector priva, gobierno incluso OM .. Esaki ta parti di nos procedura ora ta trata casonan asina ki” e la sigui bisa. Mirando cu prensa Mericano a baha riba e noticia aki den un forma formal diaranson atrobe, incluyendo e canalnan principal di noticia Mericano y e noticieronan principal, tabata kier a sa si esaki a afecta e pensamento di e turista Mericano cu kier bin Aruba. Ora cu Holloway a disparse na 2005 na Aruba, esaki a causa un dip den turismo, mirando e posicion cu e noticia aki a hinca Aruba aden e tempo ey. Pero a mitiga e efecto despues y Aruba a recupera liher. Y e hecho cu nunca a haya e curpa of cu tabatin un admission, tur cos a keda na ‘rumor’. Pero awor cu tabatin confusion, e pensamento lo por a cambia, y pesey a puntra e CEO si e noticia awor tabatin impacto mesora. A compronde pues cu ‘te cu aworaki’ e no tabatin efecto.