Plasterk: Proximo Rijksministerraad ta discuti riba candidatonan CAFT

DEN HAAG – Den e proximo reunion di Conseho di Minister di Reino (Rijksministerraad), lo dicidi riba e candidatonan cu tin cu forma e College Aruba Financieel Toezicht. Esaki segun pensamento di minister hulandes Ronald Plasterk. Den un declaracion haci na Caribisch Netwerk diaranson despues di e ultimo RMR, (Rijksministerraad) e ta splica cu e ta premira cu den e proximo reunion esey lo bin na ordo. Mientrastanto e tin tur confiansa cu Aruba lo tene su mes na e protocol firma. E garantia, segun Plasterk, ta e palabracion haci, cu firma bou di e protocol. ‘Esey ta enfaticamente e protocol cu e firma bou di dje’.

PROTOCOL RATIFICA

Tabata diaranson cu Rijksministerraad a reuni na Hulanda, unda cu a trata e situacion financiero di pais Aruba. Aki a mustra cu ta ratifica e protocol, y ta kita e Algemene Maatregel van Rijks Bestuur for di mesa, pero cu ta wante pendiente si encaso Aruba no cumpli cu e palabracion. Pues manera ta bisa na hulandes, ‘van tafel, maar niet van de baan’. Esaki a keda specificamente stipula den e protocol, como punto 11, unda cu ta bisa cu si Aruba no cumpli cu e protocol, of ta haci esaki laat, of desvia di dje, Hulanda por haci uso di e instrumentonan pa forza Aruba pa cumpli. Y esaki ta e AMvRB.

COMUNICADO DI GOBIERNO

Gobierno e siman aki a manda un comunicado riba e tema, splicando cu Hulanda a kita e AMvRB for di mesa. Segun e comunicado di gobierno “ Minister Plenipotenciario Alfonso Boekhoudt a atende e reunion aki (RMR) y den oranan tempran di mainta Prome Minister Eman tabatin contacto cune riba e decision importante cu a wordo tuma. Durante e reunion ey e AMvR a wordo kita for di mesa y na su lugar a pone e acuerdo nobo como punto central con Aruba y Hulanda ta sigui padilanti pa loke ta finanzas di pais Aruba” e comunicado a bisa textualmente. Por wak e declaracion di Plasterk aki (cortesia Caribisch Netwerk)