Huez: Presentadornan di Enfoke mester rectifica declaracionan contra minister

ORANJESTAD – Huez diaranson a sentencia e presentadornan di e programa radial Enfoke, esta Patrick Paskel y Nelson “Speed” Andrade, pa rectifica nan declaracion difamatorio contra minister di husticia Rocco Tjon. Y pa cada dia of parti di dia cu no cumpli cu e sentencia, ambos tin cu paga un multa di 5 mil florin te na un maximo di 75 mil florin. Ambos a declara caba na noticiacla.com cu nan lo apela e sentencia aki. No obstante esaki, huez a exigi pa e rectificacion tuma lugar asina mes, aunke tin apelacion. 

SUFICIENTE BASE

Como parti di e evaluacion di huez, ta mustra cu ambos presentador a haci declaracion den direccion di e minister, cu ta atacha su bida personal y profesion como minister den un forma hopi negativo. Segun huez, pa e acusacionan contra e minister ta hustifica, mester tin suficiente base legal pa nan por para ariba, locual den e caso aki, segun huez, e presentadornan a carece di dje. Algo cu segun e huez, lo tin sosten tambe den un eventual caso di profundidad unda cu aki tambe, e pensamento contra e presentadornan lo tin e mesun resultado. 

SENTENCIA

Den su sentencia, huez a rechasa e parti Paskel di e caso pa pidi pa scucha testigo. Ademas tur dos presentador, pues tanto Paskel como Andrade a haya un texto presenta cu ta contene e rectificacion cu nan mester presenta tanto den e programa radial Enfoke, como riba e pagina di Facebook y canal di Youtube, di 24ora.com. Esaki mester wordo lesa den e siguiente programa di nan, despues cu nan a formalmente keda presenta cu e sentencia. 

REACCION DI PASKEL Y ANDRADE

Mesora e dos presentadornan a duna nan reaccion pa noticiacla.com. Segun Paskel, den un caso sumario, esta un kortgeding no ta existi e posibilidad pa bin cu testigo. Algo cu nan tabata kier den e caso ora cu a presenta esaki luna pasa. E testigonan segun Paskel, lo a prueba e loke cu e dos presentadornan tabata bisa di e minister. Pero huez consecuentemente a rechasa esaki mirando cu tabata trata di un caso sumario y no un caso di profundidad, osea un bodemprocedure zaak. Segun Paskel, nan a pidi 6 testigo duna nan testimonio, pa cual 3 a presenta, cu tabata entre otro e hefe di landsrecherche, y e hefe di bizo di e tempo ey. “Awor e bodemprocedure ta bay sigui. Anto awor nos tey papia cu e testigonan, y nos ta bay LOB e caso (Landsverordening Openbaarheid van Bestuur) (esaki ta ora cu ta pidi pa haya aceso na cierto documento di gobierno:red). Argumento di Paskel pa esaki ta pasobra den e caso, OM via e abogadonan di minister, a admiti cu tabatin un caso y cu e minister tabata na landsrecherche. “Solamente nan ta bisando cu e tabata (eynan) como testigo, y nos a bisa cu e tabatey como sospechoso. Awel, nos ta bay busca pa haya tur e documentonan y pa scucha testigonan cu probablemente lo duna un otro declaracion of un otro bista di con cosnan a bay e tempo ey” Paskel a sigui bisa. Esaki, pasobra ta trata di un caso di 10 aña pasa, esta na 2013. Click AKI pa lesa e sentencia completo.