Parlamentario ta cuestiona autoridad di minister pa a firma acuerdo financiero cu Hulanda

ORANJESTAD – Minister di finanza Xiomara Maduro no tabata autorisa pa firma e acuerdo di fiansa pa Aruba cu Hulanda pa 20 aña, pa paga e debe di Covid19 cu Hulanda. Por lo menos, segun Parlamentario independiente Ryçond Santos Do Nascimento. Den un carta fecha 17 di October 2023, e parlamentario ta manda su preguntanan via presidente di Parlamento Edgard Vrolijk pa e mandatario en cuestion. 

NO AUTORISA

Segun e parlamentario, conforme e articulo 22 inciso 2 di e ley di comptabilidad di 1989, e minister no por firma un acuerdo cu ta mara pais Aruba pa mas di 5 aña. Esaki ta un problema pasobra e mandatario a caba firma un acuerdo valido pa 20 aña. ademas, segun do Nascimento, e mandatario ta autorisa pa solamente haci gasto riba nomber personal y na nomber di pais Aruba solamente si e ta apodera conforme un landsverordening (ley) di presupuesto cu ta concerni su cartera pa e respectivo aña. Algo cu aworaki no ta e caso.   

BASE LEGAL PA FIRMA

Como tal, e parlamentario kier sa di e mandatario, a base di cua base legal e la firma e acuerdo di prestamo dia 10 di October ultimo unda cu Aruba tin cu paga Hulanda mas di 900 miyon florin den 20 aña na un tasa di interes (ainda) di 6.9%. E parlamentario kier un splicacion detaya y motiva di e mandatario.