VALERO: Proceso di desmantelacion ta continua y no tin benta

SAN ANTONIO – “ E plan di desmantelacion di e refineria ta continua, y no tin ningun plan pa benta di e refineria”. Asina e vocero di e refineria Bill Day a confirma na NoticiaCla.com awe mainta. Cualkier scenario actual discuti, ta puro speculacion, Day a sigui bisa. “Mi no por specula riba posibel scenario of situacionnan hipotetico”. Pues Valero ta confirma cu nada no a cambia desde cu nan a confirma e paro di benta y comienso di e desmantelacion. Esaki mirando cu tin informacion circulando di posibel candidato pa benta.

NELSON ENGLISH

E siman aki tabatin informacion cu lo tabatin un intencion di benta di e refineria, y cu e ex hefe di e refineria (tempo di Coastal), Nelson English, lo tabata interesa y a bin Aruba pa papia riba un posibel compra. Esaki sinembargo a resulta di no ta e caso, y ta solamente a bin splica kico tur ‘lo por sosode si haci un esfuerso y kico tur mester haci pa e refineria habri bek’. Mientras cu e tabata un intencion, e realidad tabata otro. Solamente sondeando intencionan pero nada concreto.

PLAN TA CONTINUA

Valero di su banda mientrastanto, ta continua pues riba su rumbo di desmantela, y no ta interesa mas den un benta. Nan ta continua nan proceso y no a cambia di plan, y no tin ningun cliente cu ta den proceso pa cumpra e refineria tampoco.